მედვედევის მხარდაჭერა “ოცნებას”

რუსეთის უშიშროების საბჭოს თავმჯდომარის მოადგილე, დიმიტრი მედვედევი ამტკიცებს, რომ დასავლეთს სურს კონტროლის მოპოვება რუსეთის მეზობელ ქვეყნებს, მათ შორის საქართველოზე და სომხეთზე.

სტატიაში “კაცობრიობამ საბოლოოდ უნდა მოიშოროს კოლონიური სისტემის მემკვიდრეობა. მეტროპოლიების დრო ამოიწურა” მედვედევი წერს, “ნეოკოლონიალისტებს არ სურთ პატივი სცენ სხვა სახელმწიფოების ცნობილ სტრატეგიულ საზღვრებს”.

“უნდა ვაღიაროთ: ნეოკოლონიალიზმი დიდი ხანია მიუახლოვდა ჩვენი ქვეყნის საზღვრებს. პირველი ნაბიჯი ამ მიმართულებით იყო რუსეთის მეზობლებზე კონტროლის მოპოვება. მათ შორის საქართველოსა და უკრაინაში „ფერადი რევოლუციების“ წაქეზება, როდესაც თბილისსა და კიევში აშშ-ის სახელმწიფო დეპარტამენტის სტიპენდიანტის მ.სააკაშვილისა და ყოფილი ამერიკელი ჩინოვნიკის ქმრის ვ.იუშჩენკოს მარიონეტული რეჟიმები მოიყვანეს ხელისუფლებაში.

ტრადიციულად რუსეთი საქართველოს ადანაშაულებს 2008 წლის ომში. მედვედევი წერს – “პირველმა 2008 წლის აგვისტოში გააჩაღა აგრესია აფხაზეთისა და სამხრეთ ოსეთის ხალხების წინააღმდეგ, რასაც მოჰყვა მყისიერი და მკაცრი უკუპასუხი რუსეთის მხრიდან. მეორეს მუშაობა შეაჯამა 2010 წლის საპრეზიდენტო არჩევნებმა, რომელშიც ვ. იუშჩენკომ მიიღო ხმების 5%-ზე ცოტა მეტი – ერთ-ერთი ყველაზე ცუდი შედეგი მოქმედი სახელმწიფოს მეთაურებისთვის ისტორიაში”.

მისივე მტკიცებით, “პირველი წარუმატებლობის” მიუხედავად, დასავლეთმა უარი არ თქვა რუსეთის მეზობლების “დამონების გეგმებზე” და კონცენტრირება მოახდინა უკრაინაში საკუთარი ნეოკოლონიალური ხიდის შექმნაზე – “2014 წლის თებერვლის სახელმწიფო გადატრიალების შედეგად ქვეყანამ მთლიანად დაკარგა პოლიტიკური სუბიექტურობა”. მისი თქმით, უკრაინაზე “გარე კონტროლია” დამყარებული და მისი “გათავისუფლება” რუსეთის ომით იქნება შესაძლებელი.

მედვედევი საუბრობს სომხეთზეც და ამბობს, რომ “ნეო-მეტროპოლიების” სამიზნე ახლა ისაა. მისი თქმით, აშშ-სა და ევროკავშირის, ასევე ნატოს წარმომადგენლები სულ უფრო ხშირად ჩადიან სომხეთში და ქვეყანა იღებს დაპირებებს ევროკავშირის წევრობაზე, მაგრამ არავინ აპირებს სომეხი ხალხისთვის “რჩეულთა კლუბის” კარის გაღებას:

“ჰკითხონ ნეობანდერელებს, მოახერხეს თუ არა ევროკავშირის წევრობის მოპოვება. არა, და ისინი ამას მალე ვერ მიიღებენ, დაელოდებიან საერთოდ? შეხედონ საქართველოს, სადაც ახლახან დამტკიცდა კანონი, რომელიც აშშ-სა და ევროკავშირს არ მოეწონათ და რა? და აი, რა – სანქციები! ევროპარლამენტის მიერ 2024 წლის მარტში მიღებული რეზოლუცია ევროკავშირსა და სომხეთს შორის ურთიერთობების გაძლიერების შესახებ, ფაქტობრივად, ჩვეულებრივი ქაღალდია ვალდებულებების გარეშე”, – წერს მედვედევი.

banner
წინა სტატიაშიბოკერია: ერთიანი სია იქნება უმძიმესი შეცდომა, საჩუქარია რეჟიმის პროპაგანდისთვის
შემდეგი სტატიაG7-ის გადაწყვეტილებით, გაყინული რუსული აქტივებიდან უკრაინას სესხის სახით 50 მილიარდი დოლარი გადაეცემა