„ომბუდსმენის ან ავტორიტეტული არასამთავრობო ორგანიზაციის პროცესში მესამე, ნეიტრალურ მხარედ ჩართვა სტრასბურგის სასამართლოს დანერგილი პრაქტიკაა.“ – ამის შესახებ „ევროპული საქართველოს“ წევრმა, ოთო კახიძემ ჟურნალისტებთან საუბრისას განაცხადა.
„ევროპულ სასამართლოს აქვს პრაქტიკა, როდესაც სახალხო დამცველის აპარატს რთავს ხოლმე გადაწყვეტილების აღსრულების ნაწილში მესამე მხარედ, როგორც ნეიტრალურ, ობიექტურ მხარეს, რომლის დასკვნებიც, რეკომენდაციებიც მხედველობაში მიიღება სხვა მასალებთან ერთად. ეს ჩვეულებრივი პრაქტიკაა, ავტორიტეტულ არასამთავრობო ორგანიზაციებსაც კი უსმენს ხოლმე სტრასბურგი, როცა სჭირდება რომ ნეიტრალური პოზიცია გაიგოს. ამ შემთხვევაშიც ქალბატონ ნინო ლომჯარიას თხოვნა სასამართლოსადმი სრულიად ლეგიტიმურია, შეესაბამება სტრასბურგის პრაქტიკას და მე დარწმუნებული ვარ, რომ სასამართლო ამას გაითვალისწინებს და მიიღებს სახალხო დამცველის აპარატის და თავად ომბუდსმენის, როგორც ნეიტრალური ინსტიტუტის პოზიციას მხედველობაში.“- განაცხადა კახიძემ
