მეუფე გრიგოლმა გაფართოებულ საეკლესიო კრებაზე დედა ეკლესიის მომავლის საკუთარი პროგრამული ხედვის ძირითადი თეზისები წარადგინა. ფოთისა და ხობის მიტროპოლიტი რამდენიმე მნიშვნელოვან მიმართულებაზე ამახვილებს ყურადღებას:
მართვა-გამგეობის დებულება: საჭიროა დებულების დახვეწა, რომ ის სრულ თანხმობაში იყოს როგორც სჯულის კანონთან, ისე თანამედროვე გამოწვევებთან.
კრებსითი მმართველობა: წმიდა სინოდის უფრო ხშირი და საფუძვლიანად მომზადებული სხდომების გამართვა.
სასულიერო პირთა მხარდაჭერა: მღვდელმსახურთა სოციალური დაცვის გაძლიერება და ეკლესიაში სამართლიანი, გამჭვირვალე და სოლიდარული სისტემის დამკვიდრება.
ახალი თაობა და დიასპორა: ახალგაზრდობის ეკლესიურ ცხოვრებაში ჩართვა საგანმანათლებლო საქმიანობით და საზღვარგარეთის ეპარქიების გაძლიერება ემიგრანტების მხარდასაჭერად.
„ჩვენი მოვალეობაა არ დავუშვათ, ერთი მხრივ, ტრადიციის უგულებელყოფა, ხოლო, მეორე მხრივ, მშრალი ფორმალიზმი, რომელიც აუფერულებს ეკლესიური ცხოვრების სიღრმეს“, — აცხადებს მიტროპოლიტი გრიგოლი.
