საქართველოს ახალი კანონები უცხოური დაფინანსების წინააღმდეგ და პოლიტიკური საქმიანობის შეზღუდვის შესახებ, ქვეყნის დემოკრატიულ და სამოქალაქო სივრცეზე კიდევ ერთ თავდასხმას წარმოადგენს, – ამის შესახებ გაფართოების საკითხებში ევროკომისარი, მარტა კოსი სოციალურ ქსელში წერს.
„პოლიტიკურ გამოხატვაზე სახელმწიფო კონტროლის ავტოკრატიული სისტემა საქართველოს კიდევ უფრო აშორებს ევროპულ მომავალს, რომელიც მისი მოსახლეობის უმრავლესობას სურს“, – წერს მარტა კოსი X-ზე.
მანამდე, მარტა კოსმა და ევროკავშირის უმაღლესმა წარმომადგენელმა, კაია კალასმა უცხოური დაფინანსებისა და პოლიტიკური საქმიანობის შესახებ საქართველოს საკანონმდებლო ცვლილებებთან დაკავშირებით ოფიციალური განცხადება გაავრცელეს.
„საქართველოს პარლამენტის მიერ 4 მარტს უცხოური დაფინანსებისა და პოლიტიკური საქმიანობის შესახებ საკანონმდებლო პაკეტის მიღება საქართველოს ხელისუფლების სისტემატური ძალისხმევის ნაწილია, რომელიც ქვეყნის დემოკრატიული და სამოქალაქო სივრცის შეზღუდვაზეა მიმართული“, – ნათქვამია განცხადებაში.
