მარიანა ჩოლოიანი საავადმყოფოდან პენიტენციურ დაწესებულებაში გადაიყვანეს

15 წლის მოზარდის გარდაცვალების საქმეზე დაკავებული გამომძიებელი, მარიანა ჩოლოიანი საავადმყოფოდან პენიტენციურ დაწესებულებაში გადაიყვანეს, – ამის შესახებ დაკავებულის ადვოკატმა, თეონა გვაზავამ განაცხადა.

მისი თქმით, დაკავებულის ჯანმრთელობის მდგომარეობა გაუმჯობესდა და ის უკვე პენიტენციურ დაწესებულებაშია მოთავსებული.

ამასთან, თეონა გვაზავას განცხადებით, დაცვის მხარემ უკვე ჩაიბარა ჩოლოიანისთვის აღკვეთის ღონისძიების შეფარდების განჩინება, რომელსაც 48 საათის განმავლობაში გაასაჩივრებს.

ბრალდებულ გამომძიებელს, მარიანა ჩოლოიანს თბილისის საქალაქო სასამართლომ აღკვეთის ღონისძიების სახით პატიმრობა გუშინ შეუფარდა. აღკვეთის ღონისძიებაზე მსჯელობა სასამართლოს გადაწყვეტილებით, კლინიკაში გაიმართა.

მარიანა ჩოლოიანს ბრალი საქართველოს სისხლის სამართლის კოდექსის 335-ე მუხლის პირველი ნაწილით გათვალისწინებული დანაშაულის ორ ეპიზოდში წარედგინა, რაც მოხელის მიერ ჩვენების მიცემის იძულებას გულისხმობს. გამოძიებას სახელმწიფო ინსპექტორის სამსახური აწარმოებს.

15 წლის მოზარდის გარდაცვალების საქმესთან დაკავშირებით დიდუბე-ჩუღურეთის პოლიციის სამმართველოს გამომძიებელი მარიანა ჩოლოიანი 17 დეკემბერს დააკავეს. იმავე საღამოს ის ჯანმრთელობის მდგომარეობის გაუარესების გამო, სახელმწიფო ინსპექტორის სამსახურიდან კლინიკაში გადაიყვანეს.

banner
წინა სტატიაშიცოტნე გამსახურდიაზე გაკეთებული განცხადებებით ოპონენტებმა ცინიზმის უმაღლესი მწვერვალი დაიპყრეს
შემდეგი სტატიახოშტარია-ვაჟა ექიმმა თავი გაწირა, “ოცნება” კი ოპონენტებს დევნის და ამერიკელებს ლანძღავს