საქართველოს პრეზიდენტი ოპერისა და ბალეტის თეატრის პირველ სპექტაკლს არ დასწრებია.კულტურის სამინისტროს გადაწყვეტილებით, საპრეზიდენტო ლოჟაში ადგილები “ქართუ ჯგუფს” გადასცეს, პრეზიდენტს ადგილი კი დარბაზში, მთავრობის სხვა წარმომადგენლებისგან მოშორებით შესთავაზეს. თუმცა, გიორგი მარგველაშვილი სპექტაკლზე არ მივიდა.
როგორც მედიასთან პრეზიდენტის საზოგადოებასთან ურთიერთობის ხელმძღვანელმა განაცხადა, გიორგი მარგველაშვილი სპექტაკლს ხვალ, რიგით მოქალაქეებთან ერთად დაესწრება.დღევანდელ სპექტაკლს ასევე არ ესწრებოდა ბიძინა ივანიშვლი. ცნობლია, რომ ყოფილ პრემიერ-მინისტრს, ირაკლი ღარიბაშვილსაც, გაუგზავნეს მოსაწვევი, თუმცა თეატრში არც ის მისულა.
30 იავნარს, თბილისში, ოპერისა და ბალეტის თეატრი საპროტესტო აქციის ფონზე გაიხსნა. მოქალაქეთა ნაწილის უკმაყოფილება გამოიწვია იმ ფაქტმა, რომ პრემიერაზე დასწრება მხოლოდ მოსაწვევებით იყო შესაძლებელი.ოპერის მოყვარულები თეატრის ეზოში შეიკრიბნენ. რამდენიმე მათგანს თეატრის ეზოში მიტანილი ჰქონდათ ტრანსფარატი, წარწერით: “ბელადებს სჭირდებათ მოსაწვევი”.
ოპერისა თეატრის გახსნის პირველ დღეს დაგეგმილ ღონისძიებაზე დამსწრეთა ნუსხა ოპერისა და ბალეტის ადმინისტრაციამ და საქართველოს კულტურისა და ძეგლთა დაცვის სამინისტრომ შეადგინეს. კულტურის სამინისტრომ განმარტებით, ოპერის შენობა არ იძლეოდა საშუალებას, რომ ყველა მსურველი გახსნის პირველივე დღეს დასწრებოდა პრემიერას და ამის გამო სამი საპრემიერო ჩვენების გამართვის შესახებ მიიღეს გადაწყვეტილება.
თბილისის ზაქარია ფალიაშვილის სახელობის ოპერისა და ბალეტის თეატრი “აბესალომ და ეთერით” გაიხსნა. სარემონტო სამუშაოები 6 წლის განმავლობაში მიმდინარეობდა. სულ ოპერისა და ბალეტის თეატრის აღდგენა და რესტავრაცია 40 მილიონ დოლარამდე დაჯდა.
საქართველოს კულტურისა და ძეგლთა დაცვის სამინისტროს ინიციატივითა და მხარდაჭერით, გერმანულ კომპანიაში “გერიეცი” სერგო ქობულაძის ესკიზის მიხედვით, თეატრის ფარდა დაიბეჭდა.
“ძალიან ემოციური დღეა, ნამდვილად ულამაზესი გამოვიდა ოპერისა და ბალეტის თეატრი. მინდა, მივულოცო ხელოვნების სფეროს ყველა წარმომადგენელს ეს მართლაც სასიხარულო დღე და მინდა მივულოცო თბილისს. ასევე მინდა, რომ ყველანაირი პოლიტიკა გვერდზე გადავდოთ და მე როგორც ერთმა მოქალაქემ, გიორგი კვირიკაშვილმა მინდა მივულოცო საქართველოს მოქალაქეს ბიძინა ივანიშვილს, რომელმაც ეს ძალიან მნიშვნელოვანი რამ გააკეთა საქართველოსთვის და ჩვენს ქვეყანას ეს შენობა აჩუქა“, – განაცხადა გიორგი კვირიკაშვილმა. ამასთან, პრემიერ-მინისტრმა საზოგადოების იმ ნაწილს ბოდიში მოუხადა, რომლებმაც თეატრის გახსნის ღონისძიებაზე დასწრება ვერ შეძლეს.
„აქვე მინდა ბოდიში მოვუხადო ყველა იმ ადამიანს, რომელმაც ვერ შეძლო და ვერ ესწრება ამ წარმოდგენას. ძალიან ბევრი შესაძლებლობა იქნება კიდევ ასეთი. სიამოვნებით დავუთმობდი ჩემს ადგილს, უბრალოდ, ალბათ ძალიან ბევრნი არიან და არ მინდა უაზრო ჟესტი გამომივიდეს”, – აღნიშნა მთავრობის მეთაურმა.