მანჯგალაძე – საარჩევნო ცვლილებებთან დაკავშირებით ეუთო/ოდირი-ს დასკვნა არ არის ცალსახად პოზიტიური

საარჩევნო ცვლილებებთან დაკავშირებით ეუთო/ოდირი-ს დასკვნა არ არის ცალსახად პოზიტიური, – განუცხადა ჟურნალისტებს „სტრატეგია აღმაშენებლის“ წარმომადგენელმა, პაატა მანჯგალაძემ.

„მაგალითად, რაც იყო დასმული ეუთო/ოდირის დასკვნაში, რომ აუცილებელია ადმინისტრაციული რესურსის გამოყენებაზე უფრო მეტი და ნათელი რეგულაციების არსებობა; ის, რომ ხმების დათვლისა და გაბათილების წესის შესახებ მკვეთრი ჩანაწერი უნდა არსებობდეს; ის, რომ გასაჩივრების ვადები უნდა იყოს უფრო დიდი და ხელმისაწვდომი მხარეებისთვის – ეს ყველა საკითხი, რაც არის ჩამოთვლილი, ძალიან მნიშვნელოვანია. ასევე, „სტრატეგია აღმაშენებელს“ გვაქვს ჩვენი შეთავაზებები, იმ საკითხებში, რომლებიც დაკავშირებულია ადამიანურ ფაქტორთან ხმების დათვლის დროს ან ვთქვათ, საარჩევნო უბანზე ადამიანის შესვლასთან დაკავშირებით ამ საკითხებში ჩავრთოთ ტექნოლოგიები, რომლებიც უზრუნველყოფს ობიექტურად საარჩევნო პროცესის წარმართვას“, – აცხადებს მანჯგალაძე.

პაატა მანჯგალაძის თქმით, ეუთო-ს დასკვნა ამბობს, რომ ზოგი ცვლილება არის შემაშფოთებელი.

„ცალსახად, ეუთო-ს დასკვნა ამბობს, რომ ზოგი ცვლილება არის შემაშფოთებელი; მაგალითად, საუბარია იმაზე, რომ წევრის ყოლა საარჩევნო ადმინისტრაციაში, რომელიც უკავშირდება პარლამენტში ყოფნას, უსამართლოდ არის მიჩნეული და ჩვენც მაგას ვამბობთ, ეს ეწინააღმდეგება დემოკრატიის პრინციპს, გამორიცხავს ბოიკოტის არსებობას პარლამენტში. ერთობლიობაში ჩვენთვის მისაღებია ეს დასკვნა და ამასთან ერთად, ჩვენ გვაქვს ჩვენი ცვლილებები, რომელსაც „სტრატეგია აღმაშენებელი“ წარადგენს იქით კვირაში.

ჩვენი შენიშვნები დაკავშირებულია ტექნოლოგიების უფრო მეტ გამოყენებასთან საარჩევნო პროცესში. ეს უკავშირდება, როგორც ხმების დათვლის და ხმის მიცემის პროცედურას, ასევე, დაკავშირებულია ადამიანის საარჩევნო უბანზე შესვლის საკითხთან. ეს დააზღვევს იმას, რომ უფრო ნაკლები „კარუსელი“ იყოს და დააზღვევს იმას, რომ მანიპულაცია ნაკლები იყოს ხმების დათვლის დროს. ჩვენ მიერ შეთავაზებები გულისხმობს იმას, რომ უფრო ნაკლები შესაძლებლობა უნდა დავტოვოთ მანიპულაციების საარჩევნო პროცესში“, – აცხადებს პაატა მანჯგალაძე.

banner
წინა სტატიაშიჟანრი ლოლაშვილი – კახი კავსაძე ქართულ ხელოვნებაში ჩვეულებრივი მოვლენა არ იყო
შემდეგი სტატიაიოსელიანი – მოხარული ვარ, რომ ეუთო/ოდირმა დადებითად შეაფასა საარჩევნო რეფორმასთან დაკავშირებული კანონპროექტი