ბიზნესსექტორში პირველ კვარტალში დაახლოებით 38 ათასი ახალი სამუშაო ადგილი შეიქმნა. ვფიქრობ, ეს არის ძალიან მნიშვნელოვანი ტენდენციის მაჩვენებელი, – ამის შესახებ საქართველოს პრემიერ-მინისტრობის კანდიდატმა, მამუკა ბახტაძემ განაცხადა.
მისი თქმით, რეგიონებს შორის არსებობს ასიმეტრია და ამ კუთხით მუშაობა უნდა გაგრძელდეს, მაგრამ კერძო სექტორში სამუშაო ადგილების შექმნის ტენდენცია საკმაოდ დადებითია.
„რაც შეეხება პირდაპირ უცხოურ ინვესტიციებს, შარშან იყო ისტორიული მაქსიმუმი საქართველოსთვის, რაც არის ძალიან მნიშვნელოვანი გამარჯვება და საქართველოს ყველა მოქალაქე ამით კმაყოფილი უნდა იყოს. რაც შეეხება პირველ კვარტალს, აქ მოხდა რამდენიმე მნიშვნელოვანი პროცესი. პირველი – „ბი პის“ ყველაზე მსხვილი ინფრასტრუქტურული პროექტი საქართველოში დასასრულს მიუახლოვდა და მეორე – ადგილობრივმა რეზიდენტმა კომპანიამ იყიდა არარეზიდენტი კომპანია. ეს იყო ძალიან მსხვილი ტრანზაქცია, კომერციულ დეტალებში არ შევალ, ალბათ ყველამ იცის ამ ტრანზაქციის შესახებ”, – განაცხდა მამუკა ბახტაძე.
