საფრანგეთისა და გერმანიის ლიდერებმა, ემანუელ მაკრონმა და ოლაფ შოლცმა, დღეს გამართული სატელეფონო საუბრისას რუსეთის პრეზიდენტს, ვლადიმერ პუტინს მოუწოდეს, უკრაინაში ცეცხლის შეწყვეტას დასთანხმდეს და ქვეყნიდან რუსული ჯარი გაიყვანოს, – ინფორმაციას CNN-ი გერმანიის მთავრობის პრესსამსახურზე დაყრდნობით ავრცელებს.
მათივე ინფორმაციით, გერმანიის კანცლერი, ოლაფ შოლცი და საფრანგეთის პრეზიდენტი, ემანუელ მაკრონი ვლადიმერ პუტინს 80 წუთის განმავლობაში ესაუბრნენ.
„გერმანიის კანცლერმა და საფრანგეთის პრეზიდენტმა ცეცხლის დაუყოვნებლივ შეწყვეტა და რუსული ჯარების გაყვანა მოითხოვეს. მათ მოუწოდეს რუსეთის პრეზიდენტს, ჩაერთოს სერიოზულ პირდაპირ მოლაპარაკებებში უკრაინის პრეზიდენტთან და გამონახოს კონფლიქტის დიპლომატიური გადაწყვეტის გზა“, – ნათქვამია გერმანიის მთავრობის პრესრელიზში.
