საქართველოს საგარეო საქმეთა მინისტრი მაკა ბოჭორიშვილი აცხადებს, რომ დიპლომატიური პასპორტების მფლობელებისთვის უვიზო მიმოსვლის შეჩერების მექანიზმის ამოქმედება საერთაშორისო ურთიერთობებში წარმოუდგენელია.
„უვიზო მიმოსვლის შეჩერება კლასიფიცირებულად უკვე განხორციელებულია. ამგვარი მექანიზმი აამოქმედეს უჩვეულოდ, დიპლომატიური პასპორტების მფლობელებისთვის, რაც ზოგადად წარმოუდგენელი რამ არის საერთაშორისო ურთიერთობებში. დიპლომატები, პირველ რიგში, ის ხალხია, ვინც ფლობენ დიპლომატიურ პასპორტებს, პირიქით, სარგებლობენ ხოლმე გარკვეული პრივილეგიებით, რადგან სწორედ მათ ხელში უნდა იყოს ნებისმიერი რთული ურთიერთობების მოგვარებაც კი. ნამდვილად უჩვეულოა ასეთი გადაწყვეტილება, როდესაც სწორედ დიპლომატიური პასპორტების მფლობელებზე გავრცელდა უვიზო რეჟიმის შეჩერების მექანიზმი. შესაბამისად, ახლა ჩვენ არ ვიცით, როგორ შეიძლება, კიდევ დაყონ, რა შეიძლება, იყოს კრიტერიუმები უვიზო რეჟიმის შეჩერების მექანიზმის ამოქმედებისა სხვა წრეებისთვის, რაც ნაკლებად სავარაუდოა. იცით, რომ ჩვენ გავმართეთ უკვე პირველი შეხვედრა ევროკომისიასთან. გვქონდა შესაძლებლობა, გვესაუბრა შეჩერების მექანიზმზე და ზოგადად, იმ საკითხებზე, რასაც უკავშირდებოდა ამ შემთხვევაში დიპლომატიური პასპორტების მფლობელებისთვის უვიზო რეჟიმის შეჩერება, გავაგრძელებთ ამ საკითხზე მუშაობას“, – განაცხადა მაკა ბოჭორიშვილმა.
