მაღალმთიანი დასახლების სტატუსი კიდევ 14 სოფელს მიენიჭა

მაღალმთიანი დასახლების სტატუსი კიდევ 14 სოფელს მიენიჭა, – მაღალმთიანი რეგიონების შესახებ კანონით განსაზღვრული შეღავათებით ჭიათურის, საჩხერის, ხარაგაულის, ბორჯომის, მარნეულის, ქარელის, ბაღდათისა და ტყიბულის მუნიციპალიტეტების სოფლების მოსახლეობა ისარგებლებს.

ეს სოფლებია: საჩხერის მუნიციპალიტეტის სოფელი ლიჩი; ჭიათურის მუნიციპალიტეტის სოფლები: მელუშეეთი, ბეგიაური, მანდაეთი და წყალშავი; ხარაგაულის მუნიციპალიტეტის სოფლები: მზვარე, ჩრდილი და გედსამანია; ბორჯომის მუნიციპალიტეტის სოფლები: ტაძრისი და საკირე; მარნეულის მუნიციპალიტეტის სოფელი ბრდაზორი; ქარელის მუნიციპალიტეტის სოფელი ღოღეთი; ბაღდათის მუნიციპალიტეტის სოფელი ხანი; ტყიბულის მუნიციპალიტეტის სოფელი მუხურა.

როგორც პრემიერ-მინისტრმა, გიორგი კვირიკაშვილმა მთავრობის დღევანდელ სხდომაზე განაცხადა, მაღალმთიან რეგიონებში მოსახლეობისთვის ცხოვრების პირობების შემსუბუქება ხელისუფლების ერთ-ერთი უმთავრესი ამოცანაა.

გიორგი კვირიკაშვილის თქმით, სწორედ ამას ემსახურებოდა მაღალმთიანი რეგიონების შესახებ კანონის მიღება.

„მაღალმთიანი დასახლებების ნუსხას 14 სოფელი დაემატა. ეს იმას ნიშნავს, რომ ამ სოფლებში ძალიან ბევრი მრავალშვილიანი დედა, ექიმი, პენსიონერი, ასევე საწარმოები, რომლებიც იქ ფუნქციონირებს, დამატებით შეღავათებს მიიღებს. მნიშვნელოვანია, რომ ათი ათასობით ოჯახმა უკვე ისარგებლა ამ შეღავათებით, რაც უმნიშვნელოვანესია, არა მხოლოდ ადგილზე მოსახლეობის დამაგრებისთვის, არამედ მთაში ხალხის დაბრუნებისთვის. ეს არა მხოლოდ სოციალურ-ეკონომიკური, არამედ უსაფრთხოების ამოცანაც გახლავთ. ეს პროგრამა წარმატებით მიმდინარეობს. კანონით გათვალისწინებული შეღავათების გარდა, 10 მილიონი ლარი გამოიყო მთიანი რეგიონებისთვის ტრადიციული კულტურებისა და ეკონომიკური მიმართულებების განვითარებისთვის და ეს ყველაფერი, საერთო ჯამში, ვფიქრობთ, ჩვენი მოსახლეობისთვის ძალიან მნიშვნელოვანია“, – განაცხადა გიორგი კვირიკაშვილმა.

banner
წინა სტატიაშიგიორგი კვირიკაშვილი : ნატო-სთან თანამშრომლობა დღეს უმაღლეს ნიშნულზეა
შემდეგი სტატიაპრემიერი ქუმსიშვილს მადლობას უხდის