ნაძალადევის რაიონის გამგეობა ლოტკინის დასახლებაში, კიშინიოვის ქუჩაზე მდებარე სკვერში მომხდარ ინციდენტთან დაკავშირებით განცხადებას ავრცელებს. უწყების ინფორმაციით, 22 ივნისს, რეკრეაციულ სივრცეში გაუფრთხილებელი მოპყრობის შედეგად ატრაქციონი დაზიანდა, რის გამოც ერთ-ერთმა მოზარდმა სხეულის მძიმე დაზიანებები მიიღო.
გამგეობის განმარტებით, მყარი კონსტრუქცია სკვერში ყველა სტანდარტის დაცვით (ე.წ. დაანკერებით) იყო განთავსებული. თვითმხილველების თქმით, რამდენიმე მოზარდმა კონსტრუქცია დააზიანა, რის შემდეგაც წაქცეული ატრაქციონი მოპირდაპირე მხარეს მჯდომ ბავშვს დაეცა:
„ბავშვის სიცოცხლეს საფრთხე არ ემუქრება, თუმცა მან მიიღო მძიმე დაზიანებები. ნაძალადევის რაიონის გამგეობა მუდმივ კომუნიკაციაშია ოჯახთან და მათ გაეწიათ შესაბამისი დახმარება. საქმეზე მიმდინარეობს გამოძიება… მოვუწოდებთ ყველას, გაუფრთხილდნენ, როგორც საკუთარ, ისე სხვების ჯანმრთელობას, ნუ დააზიანებენ სკვერებსა და ბაღებში არსებულ ინფრასტრუქტურას“, — ნათქვამია განცხადებაში.
