„ქართული ოცნება“ მშვიდობის ნიღბით შენიღბული ქვეყნის უბედურებაა, – ამის შესახებ დღეს, „ლელო-ძლიერი საქართველოს“ წევრმა ლევან სამუშიამ განაცხადა.
სამუშიას შეფასებით, „ქართული ოცნება“ მოქალაქეებს დასცინის.
„თავდაცვის ყოფილი მინისტრი ჯუანშერ ბურჭულაძე საქართველოს მოქალაქეების, კერძოდ, ქართული ჯარის ძარცვას აღიარებს. „ქართული ოცნება“ ასევე გვეუბნება, რომ ეკონომიკის მინისტრის მოადგილეს სუს-ის უფროსის კაბინეტში ჩემოდნებით ქრთამი მიჰქონდა. ამის პარალელურად გვეუბნებიან, რომ საქართველოს ყოფილი თავდაცვის მინისტრი, ყოფილი შინაგან საქმეთა მინისტრი, ორგზის პრემიერ-მინისტრი და პარტია „ქართული ოცნების“ ყოფილი თავმჯდომარე ირაკლი ღარიბაშვილი მექრთამეობაზეა ბრალდებული – როგორც „ქართული ოცნება“ გვეუბნება, ბიუჯეტს ძარცვავდა და ქრთამს იღებდა.
ამის პარალელურად ვხედავთ, რომ საქართველოს მოქალაქეები ქვეყნიდან გარბიან. უფასო სასადილოში კი მოქალაქეს ეუბნებიან, რომ 1.70 ლარად უნდა გამოიკვებონ – აქაც კორუფციაა და აქედანაც თანხებს იპარავენ. პარალელურად ვხედავთ, რომ პენსია არ იმატებს, ხოლო საქართველოს მოქალაქეებისგან ჯარიმების ამოღება გაორმაგებულია – ყველგან ზეწოლაა, სადაც შესაძლებელია. თავად კი სახლში ოქროს ზოდებს ინახავენ და 10 ათასობით ხელფასს ინიშნავენ.
ეს არის ის მშვიდობა, რაც „ქართულმა ოცნებამ“ მოიტანა. ეს არის მოქალაქეების დაცინვა“, – აცხადებს ლევან სამუშია.
