უმრავლესობის ნება არის, რომ მომხმარებლისთვის ნარკოპოლიტიკა იყოს ლიბერალური, ხოლო გამსაღებლებისთვის – მკაცრი, – ამის შესახებ საქართველოს თავდაცვის მინისტრმა ლევან იზორიამ ნარკოპოლიტიკასთან დაკავშირებით დასმული კითხვის საპასუხოდ განაცხადა.
მისი თქმით, ნარკოპოლიტიკასთან დაკავშირებით პოლიტიკურ გუნდში მიმდინარეობდა დისკუსია, რომელიც უახლოეს მომავალში დასრულდება.
„პოლიტიკურ გუნდში მიმდინარეობდა ინტენსიური დისკუსია, მუშაობა, რომელიც სულ ახლო მომავალში დასრულდება იმასთან დაკავშირებით, როგორი უნდა იყოს ჩვენი ქვეყნის ნარკოპოლიტიკა. ამ დისკურსში ყველა არგუმენტისთვის კარი არის ღია, თუმცა, დისკურსი ვერ იქნება უსასრულო. პრაქტიკული ამოცანა დემოკრატიაში ის გახლავთ, რომ საბოლოოდ უმრავლესობამ უნდა მიიღოს გადაწყვეტილება. უმრავლესობის ნება კი არის ის, რომ მომხმარებლისთვის ეს პოლიტიკა იყოს ლიბერალური, ხოლო გამსაღებლებისთვის იყოს მკაცრი“, – განაცხადა ლევან იზორიამ.
