25 ნოემბერს ქერჩის სრუტეში დაკავებული უკრაინის გემებისა და მეზღვაურების ბედთან დაკავშირებით შეშფოთებას გამოხატავენ სხვადასხვა ქვეყნები და საერთაშორისო ორგანიზაციები, მათ შორის, აშშ, გერმანია, საფრანგეთი, ნატო. ისინი რუსეთისგან მეზღვაურების უპირობო განთავისუფლებას ითხოვენ. რუსეთის საგარეო საქმეთა მინისტრმა სერგეი ლავროვმა პარასკევს ჟურნალისტებთან საუბარში განაცხადა, რომ აღნიშნულ თემაზე მოლაპარაკებები მხოლოდ სასამართლოს გადაწყვეტილების შემდეგ გახდება შესაძლებელი. “როცა გამოძიება დასრულდება, იქნება სასამართლო. როგორც კი სასამართლო დასრულდება, შესაძლებელი გახდება იმაზე საუბარი, როგორ შეიძლება მათი მდგომარეობის შემსუბუქება ან მოხდეს კონკრეტულ ნაბიჯებზე შეთანხმება” – ლავროვმა იტალიაში ვიზიტისას განაცხადა – “ამერიკის ხმა” წერს.