ლაშა ნაცვლიშვილი – ბიძინა ივანიშვილმა შალვა შავგულიძის მიმართ რამდენიმე ვარაუდი გამოთქვა, კითხვა არ ნიშნავს ვერდიქტს

ლევან მურუსიძე მოკლებული იყო შესაძლებლობას, რომ ქვედა ინსტანციის სასამართლოში ჩაებრუნებინა საქმე, ვინაიდან შალვა შავგულიძემ არ დაწერა საკასაციო საჩივარი, – ეს განცხადება პოლიტიკური გაერთიანება ქართული ოცნება- დემოკრატიული საქართველოს საზოგადოებასთან ურთიერთობის მრჩეველმა, ლაშა ნაცვლიშვილმა ტელეკომპანია „იმედის“ ეთერში გააკეთა.

მისი თქმით, ინტერვიუში ბიძინა ივანიშვილმა სიტყვასიტყვით თქვა, რომ ლევან მურუსიძე მოკლებული იყო შესაძლებლობას, ქვედა ინსტანციის სასამართლოში ჩაებრუნებინა საქმე, ვინაიდან შალვა შავგულიძემ არ დაწერა საკასაციო საჩივარი.

„როდესაც ვსაუბრობ, რომ მიმდინარეობს ძალიან უხეში ინტერპრეტაცია იმ გამონათქვამების, რაც ინტერვიუში იყო, ერთ რამეს ვგულისხმობ – უკლებლივ ყველა, ვინც საქართველოს ხელისუფლებაზე პოლიტიკურ შტურმს ახორციელებს, ცდილობს, საჯარო ველში დაარწმუნოს საზოგადოება, რომ ბიძინა ივანიშვილმა გირგვლიანის საქმეზე საზოგადოებას ახალი ნარატივი შესთავაზა, რომლის ფარგლებშიც მურუსიძე არის გმირი. ეს შეგიძლიათ გადაამოწმოთ ნებისმიერი იმ სპიკერის გამონათქვამებში, რომლითაც სავსეა ჩვენი მედია. არადა ბიძინა ივანიშვილმა სიტყვასიტყვით თქვა, რომ ლევან მურუსიძე მოკლებული იყო შესაძლებლობას, ქვედა ინსტანციის სასამართლოში ჩაებრუნებინა საქმე და იმიტომ იყო ამ შესაძლებლობას მოკლებული, რადგან ადვოკატმა, შალვა შავგულიძემ არ დაწერა საკასაციო საჩივარი. იმავდროულად განაცხადა, რომ არანაირი ილუზია არ აქვს იმასთან დაკავშირებით, რომ მურუსიძე ფორმალური შესაძლებლობა რომც ჰქონოდა, გამოიყენებდა, ვინაიდან მთელი სისტემა გაკონტროლებული იყო ერთი კაცის, ერთი დიქტატორის მიერ. ამ საქმეზე იყო პოლიტიკური შეთანხმება პოლიტიკურ ხელმძღვანელობაში და რასაკვირველია, მურუსიძე, როგორც ამ სისტემის ერთი მოსამართლე, სავარაუდოდ ვერანაირად მიიღებდა გადაწყვეტილებას, რომელსაც მისგან ელოდნენ. სად არის გმირად შერაცხვის მცდელობა? ამოიღეთ ნებისმიერი ოპონენტის გამონათქვამი, რომლებიც გვეუბნებიან, რომ ბიძინა ივანიშვილმა გმირად შერაცხა ლევან მურუსიძე. ეს არის ძალიან უსინდისო სიცრუე და ცილისწამება. ასეთი უხეში ინტერპრეტაცია, სიცრუე, ცილისწამება, ლანძღვა და გინება მთლიანად აკნინებს მათსავე პოზიციას, არადა როგორ სჭირდება მმართველ პარტიას ჯანსაღი ოპონირება, მაგრამ ახლა თითქოს წყალი გადაისხეს იმ სტაჟიანი ოპონენტებისა, რომლებიც მეშვიდე წელია სიცრუით და ცილისწამებით არიან დაკავებული“,- განაცხადა ლაშა ნაცვლიშვილმა

მისი თქმით, არ შეიძლება არ შევაფასოთ ის ფონი, რა ფონზეც მიმდინარეობს პარტია „ქართული ოცნების“ თავმჯდომარის ბიძინა ივანიშვილის ინტერვიუს განხილვა.

„უკლებლივ ყველა ძალისგან, ვინც ახორციელებს საქართველოს ხელისუფლებაზე პოლიტიკურ შტურმს, სამართლიანობის დეფიციტის ან უსამართლობის მომიზეზებით, ვისმენთ ერთი მხრივ, აბსოლუტურად მიუღებელ ლანძღვა-გინებას, რომელიც ამ ლანძღვა-გინების ავტორთა არგუმენტების უსუსურობაზე მეტყველებს, და მეორე მხრივ, ვიღებთ ტყუილს, ცილისწამებას და აბსოლუტურად მიუღებელ ინტერპრეტაციას იმ აზრებისა, რომელიც გამოთქვა ბიძინა ივანიშვილმა“, – განაცხადა ლაშა ნაცვლიშვილმა.

banner
წინა სტატიაშიაჭარის ტელევიზიის დირექტორის იმპიჩმენტის მოთხოვნა – მხარეთა პოზიციები
შემდეგი სტატიარუსთავში, ჭყონდიდელის დასახლების მაცხოვრებლებმა გზა გადაკეტეს