ლაშა დარსალია ზაზა გახელაძეზე: ეს არის რუსეთის პროვოკაცია და ჰიბრიდული ომის ნაწილი

საგარეო საქმეთა მინისტრის მოადგილემ ლაშა დარსალიამ საოკუპაციო რეჟიმის მიერ უკანონოდ დაკავებული საქართველოს მოქალაქის ზაზა გახელაძისთვის 12 -წლიანი სასჯელის დაკისრებაზე ისაუბრა და ამ ნაბიჯს რუსეთის პროვოკაცია და ჰიბრიდული ომის ნაწილი უწოდა.

 

მისი თქმით, რუსეთი ამგვარ ნაბიჯებს სპონტანურად არ დგამს და მას თავისი კონკრეტული ამოცანები და გეგმა აქვს. „ვითარების მაქსიმალურად დაძაბვა და ესკალაცია არის სწორედ იმ ჰიბრიდული ომის ნაწილი, რომელსაც რუსეთი საქართველოს წინააღმდეგ ახორციელებს და ამ ომს როგორც საგარეო-პოლიტიკური, ისე საშინაო განზომილება გააჩნია“ – აღნიშნა მინისტრის მოადგილემ.

 

როგორც ლაშა დარსალიამ დასძინა, რუსეთის საგარეო-პოლიტკური გზავნილი როგორც საქართველოს პარტნიორების, ისე შიდა საზოგადოებისთვის არის ის, რომ რაც არ უნდა დიდი იყოს რუსეთზე ზეწოლა, ის მაინც გააგრძელებს თავის დესტრუქციულ ნაბიჯებს. ამასთან, ჰიბრიდული ომის ერთ-ერთი მნიშვნელოვან ამოცანას წარმოადგენს ნიჰილიზმის დანერგვა და „იმ პროპაგანდისტული ეფექტის შექმნა, რომ თითქოსდა რუსეთი არის მოგებულ მხარეს, თითქოსდა რუსეთი არის ის, ვინც არ გადაიხდის არანაირ ფასს თავისი დესტრუქციული ქმედებებისთის.“

 

ლაშა დარსალიას თქმით, ამგვარი აგრესიით და სიტუაციის დესტაბილიზაციის მცდელობით, რუსეთი ცდილობს გადაფაროს საქართველოს მიმართ საერთაშორისო საზოგადოების მხარდაჭერა და ის, რომ საქართველო-რუსეთის კონფლიქტი დღეს საერთაშორისო დღის წესრიგის ერთ-ერთი მნიშვნელოვანი საკითხია. როგორც მინისტრის მოადგილემ დასძინა, ამ მხარდაჭერას ადასტურებს ის ფაქტი, რომ „ეუთოს მოქმედი თავმჯდომარე რუსეთში ვიზიტისას საუბრობდა საქართველოს საკითხზე, ასევე სახელმწიფო მდივანი ბლინკენი ლავროვთან საუბრისას საუბრობდა საქართველოს საკითხზე. ასევე მინდა გაგახსენოთ ის 70-მდე რეზოლუცია, მოხსენებები, რომლებიც ბოლო დროს არის მიღებული, მათ შორის ადმიანის უფლებათა დარღვევებზე თავად ოკუპირებულ ტერიტორიებზე და რაც ყველაზე მნიშვნელოვანია, სტრასბურგის სასამართლოს გადაწყვეტილება, სადაც ხაზგასმითაა აღნიშნული, ერთის მხრივ, რუსეთის პასუხისმგებლობა ოკუპაციასა და ოკუპირებულ ტერიორიებზე რუსეთის ეფექტურ კონტროლზე და, მეორეს მხრივ, იქ მიმდინარე ადამიანის უფლებათა მძიმე დარღვევებზე, რაც ნიშნავს ეთნიკურ წმენდაზე რუსეთის პასუხისმგებლობას“ – განაცხადა დარსალიამ. მინისტრის მოადგილის ცალსახა განცხადებით, მთლიანი პასუხისმგებლობა გახელაძის საქმეზე რუსეთის ფედერაციას ეკისრება.

 

ცნობისთვის, ოკუპირებული ცხინვალის ე.წ. უზენაესმა სასამართლომ საქართველოს მოქალაქეს, კასპის მუნიციპალიტეტის სოფელ ქვემო ჭალაში მცხოვრებ ზაზა გახელაძეს 12 წლით და 6 თვით თავისუფლების აღკვეთა მიუსაჯა.

ვირუსის ბლოკატორები