კულტურული მემკვიდრეობის დაცვის ეროვნულმა სააგენტომ უშგულში, ლამარიას მონასტრის ტერიტორიაზე მიმდინარე უკანონო მშენებლობა შეაჩერა. გადაწყვეტილება სააგენტომ მას შემდეგ მიიღო, რაც მედიაში ინფორმაცია გავრცელდა, რომ მესტიისა და ზემო სვანეთის მიტროპოლიტი ტერიტორიაზე შესაბამისი ნებართვის გარეშე სამშენებლო სამუშაოებს აწარმოებდა.
„კულტურული მემკვიდრეობის დაცვის ეროვნული სააგენტო ოპერატიულად მიაწვდის საზოგადოებას ინფორმაციას საკითხთან დაკავშირებით მიღებული გადაწყვეტილებების შესახებ. უშგულში, ლამარიას მონასტრის ტერიტორიაზე შესაბამისი ნებართვის გარეშე კელიების სამშენებლო სამუშაოები ხორციელდებოდა. მოქმედი კანონმდებლობის თანახმად, კულტურული მემკვიდრეობის ძეგლებზე ნებისმიერი სახის სამშენებლო, სარეაბილიტაციო ან სხვა ტიპის ჩარევა სააგენტოსთან წინასწარ შეთანხმებასა და დადგენილი პროცედურების გავლას საჭიროებს“, — ნათქვამია სააგენტოს განცხადებაში.
