პოლიტიკოსი თეონა აქუბარდია სოციალურ ქსელში ავრცელებს შეფასებას, რომლის მიხედვითაც, ოკუპირებული ცხინვალის რეგიონის საბაჟო სისტემების რუსეთის ფედერალურ ბაზებთან ინტეგრაცია მხოლოდ ტექნიკური გადაწყვეტილება არ არის. მისი შეფასებით, ეს წარმოადგენს კრემლის მცდელობას, ევრაზიული ეკონომიკური კავშირის წევრი სახელმწიფოები ირიბად ჩართოს რუსეთის ანექსიურ პოლიტიკაში და შეასუსტოს საქართველოს ოკუპირებული ტერიტორიების არაღიარების საერთაშორისო პოლიტიკა.
“მოსკოვის ახალი ჰიბრიდული მახე და ევრაზიული კავშირის ქვეყნების ირიბი ჩათრევა ოკუპირებული ცხინვალის ანექსიაში!
კრემლის ბოლო ნაბიჯები ცხინვალის რეგიონის საბაჟო სისტემების რუსულ ბაზებთან ინტეგრაციაზე გაცილებით შორსმიმავალ გეოპოლიტიკურ მზაკვრობას შეიცავს. ეს არის პირდაპირი მცდელობა, ევრაზიული ეკონომიკური კავშირის (ეეკ) წევრი სახელმწიფოები — ყაზახეთი, სომხეთი, ყირგიზეთი და ბელარუსი — რუსეთის ანექსიური პოლიტიკის ირიბ თანამონაწილეებად იქცნენ.
📉 „რუხი ზონის“ შექმნა და პარტნიორების გამოყენება
ვინაიდან ყაზახეთი, სომხეთი და ყირგიზეთი ოფიციალურად და ურყევად უჭერენ მხარს საქართველოს ტერიტორიულ მთლიანობას, მოსკოვი ცდილობს მათ პოლიტიკურ პოზიციას გვერდი აუაროს ტექნიკური მანიპულაციით.
საინფორმაციო ბაზების გაერთიანებით, რუსეთი ახდენს ოკუპირებულ ტერიტორიაზე რეგისტრირებული ტრანსპორტის „ლეგალიზებას“ საკუთარ შიდა სისტემაში. შედეგად, პარტნიორი ქვეყნების საბაჟო სტრუქტურები, რომლებიც ავტომატიზებულ რეჟიმში ენდობიან ერთიან ბაზას, იძულებულნი ხდებიან დაუშვან ამ ტრანსპორტის გადაადგილება. ეს არის საერთაშორისო მექანიზმების ბოროტად გამოყენება არაღიარების პოლიტიკის ეროზიისთვის.
🛡️ რა უნდა იყოს წესით საქართველოს პასუხი?
1️⃣ მრავალმხრივი დიპლომატიური რეაგირება: საქართველოს საგარეო უწყებამ პარტნიორებთან ორმხრივი არხებით უნდა დასვას საკითხი სტრატეგიული უსაფრთხოების კონტექსტში. ნოტებსა და სამუშაო შეხვედრებზე ხაზი უნდა გაესვას იმას, რომ რუსეთი საკუთარი პოლიტიკური მიზნებისთვის იყენებს მათ სუვერენულ საბაჟო სივრცეს, რითაც დარტყმის ქვეშ აყენებს მათ საერთაშორისო რეპუტაციას.
2️⃣ სანქციებისა და რეექსპორტის საფრთხეების ჩვენება: ევრაზიული კავშირის წევრ სახელმწიფოებს მკაფიოდ უნდა მიეწოდოს დიპლომატიური სიგნალი, რომ ოკუპირებული რეგიონის ინტეგრაცია ერთიან სისტემაში ზრდის „შავი ხვრელების“ წარმოქმნას (მაგალითად, სანქცირებული ან მოპარული ავტომობილების რეექსპორტი). შესაბამისად, მოსკოვის ამ თამაშში უნებლიე თანამონაწილეობამ შესაძლოა ევრაზიული კავშირში მყოფი ქვეყნების საბაჟო თუ საფინანსო სტრუქტურები მეორადი სანქციების საფრთხის წინაშე დააყენოს.
რუსულ ჰიბრიდულ ნაბიჯებს საქართველომ დროული, მიზანმიმართული და ხისტი დიპლომატიური კონტრზომებით უნდა უპასუხოს! 🇬🇪
ესეც ტექსტის არაოფიციალური თარგმანი:
“სამხრეთ ოსეთის მოქალაქეებს შეუძლიათ წინასწარ შეიყვანონ თავიანთი პირადი ავტომობილების მონაცემები რუსეთის ფედერალური საბაჟო სამსახურის საინფორმაციო სისტემებში, ევრაზიის ეკონომიკური კავშირის (ეეკ) საბაჟო ტერიტორიაზე მათ ფაქტობრივ დროებით შემოყვანამდე, — შეახსენეს მოქალაქეებს სამხრეთ ოსეთში რუსეთის საელჩოში.
„რუსეთის ფედერალური საბაჟო სამსახურის სამხრეთ ოსეთის საბაჟო საგუშაგო (სპეციალიზებული) ახორციელებს პირადი სარგებლობის სატრანსპორტო საშუალებების შესახებ მონაცემების წინასწარ შეტანას რუსეთის ფედერაციის საბაჟო ორგანოების ერთიან ავტომატიზებულ სისტემაში, ევრაზიის ეკონომიკური კავშირის საბაჟო ტერიტორიაზე მათ ფაქტობრივ დროებით შემოყვანამდე.
მონაცემების შეტანის შემდეგ, ინფორმაცია სატრანსპორტო საშუალებების შესახებ ხელმისაწვდომი ხდება ჩრდილოეთ ოსეთის საბაჟოს მრავალმხრივი საავტომობილო გამშვები პუნქტის (საავტომობილო საკონტროლო-გამტარი პუნქტი — მსგპ) „ქვემო ზარამაგის“ (ნიჟნი ზარამაგის) საბაჟო საგუშაგოს თანამდებობის პირებისთვის“, — აღნიშნეს საელჩოში.
იქვე დასძინეს, რომ შემდგომში ეს შეტანილი ინფორმაცია გამოიყენება ევრაზიის ეკონომიკური კავშირის საბაჟო ტერიტორიაზე სატრანსპორტო საშუალებების დროებითი შემოყვანის პროცედურის გასაფორმებლად, რაც მნიშვნელოვნად ამცირებს საბაჟო ოპერაციების შესრულების დროს საბაჟო საზღვრის გამშვებ პუნქტზე.
„ეს მომსახურება სამხრეთ ოსეთის მოქალაქეებისთვის უფასოა, — შეახსენეს დიპლომატიურ უწყებაში. — აღნიშნული პროცედურა არ არის სავალდებულო, დროებით შემოყვანილი პირადი სარგებლობის სატრანსპორტო საშუალებების შესახებ მონაცემების შეტანა შესაძლებელია უშუალოდ ჩრდილოეთ ოსეთის საბაჟოს მსგპ „ქვემო ზარამაგშიც“, თუმცა ეს წესი ზრდის საბაჟო ოპერაციების განხორციელების ვადებს უშუალოდ გამშვებ პუნქტზე“.
მოქალაქეებს, რომლებიც გეგმავენ მგზავრობას რუსეთის ფედერაციაში პირადი ავტომობილით, შეუძლიათ წინასწარ მიმართონ საბაჟო საგუშაგოს შემდეგ მისამართზე:
ქ. ცხინვალი, გმირების ქუჩა, კორპუსი 1, რუსეთის ფედერალური საბაჟო სამსახურის სამხრეთ ოსეთის საბაჟო საგუშაგო (სპეციალიზებული) წერს თეონა აქუბარდია.
