თბილისის ინფექციური საავადმყოფოს სამედიცინო დირექტორის, მარინა ეზუგბაიას განცხადებით, საქართველოში კორონავირუსით ინფიცირებული ორი ახალი პაციენტიდან ერთი დადასტურებულ შემთხვევასთან კონტაქტია, ხოლო მეორე სატვირთო ავტომობილის მძღოლია.
მისივე თქმით, საუბარია იმპორტირებულ შემთხვევაზე.
ამასთან, ეზუგბაიას განმარტებით, ეპიდემიოლოგიური კუთხით, ქვეყანაში სტაბილური ვითარებაა.
„თქვენ იცით, რომ დაახლოებით ორი კვირაა, შემთხვევების ძალიან ზომიერი მატება, სტაბილზიაცია გვაქვს. დღეში 2-3 ზე მეტი არ არის ახალი შემთხვევა და ახლაც მხოლოდ ორი ახალი დადასტურებული შემთხვევა გვაქვს. იყო 926 და ახლა არის 928 დადასტურებული შემთხვევა. გამოჯანმრთელებულების ციფრი სამით გაიზარდა და ამჟამად არის 794“, – განაცხადა მარინა ეზუგბაიამ და დასძინა, რომ გამოჯანმრთელებულთა რაოდენობა ინფიცირებულების 85 პროცენტზე მეტია.
მარინა ეზუგბაიას ინფორმაციით, ამ დროისთვის კოვიდ-ცენტრებში 119 პაციენტი რჩება.
