კომუნიკაციების კომისიამ საარჩევნო კოდექსის დარღვევისთვის, „მთვარ არხს“, „იმედს“, „ფორმულას“ და „პალიტრა ტვ“-ის ოქმი შეუდგინა, „ტვ პირველს“ და 4 რეგიონული მაუწყებელს – არა

region
ავტ.: region ნოემბერი 5, 2020 20:35

კომუნიკაციების კომისიამ საარჩევნო კოდექსის დარღვევისთვის, „მთვარ არხს“, „იმედს“, „ფორმულას“ და „პალიტრა ტვ“-ის ოქმი შეუდგინა, „ტვ პირველს“ და 4 რეგიონული მაუწყებელს – არა

კომუნიკაციების კომისიამ დღეს გამართულ საჯარო სხდომაზე 10 მაუწყებლის მიერ საპარლამენტო არჩევნების დროს „საარჩევნო კოდექსის“ დარღვევის საკითხები განიხილა. კომისიამ „მთავარ არხს“, ტელეკომპანია „იმედს“, „პალიტრა ტვ-ის“ და „ილიონ ტვ-ის“ სამართალდარღვევის ოქმი შეუდგინა.

მათ საარჩევნო კოდექსის 50-ე მუხლი დაარღვიეს და კენჭისყრამდე 48 საათის განმავლობაში, საკუთარ ეთერში საზოგადოებრივი აზრის გამოკითხვა გამოაქვეყნეს. ტელეკომპანია „ფორმულამ“ კი მისი დაკვეთილი ეგზიტპოლის გამოქვეყნებისას კანონით განსაზღვრული სავალდებულო ინფორმაცია არ გამოაქვეყნა.

საზოგადოებრივი მაუწყებლის აჭარის ტელევიზიის, „ტელეკომპანია პირველის“, „მეგა ტვ-ის“, „ტოკ ტვ-ის“, „პალიტრა ტვ-ის“ და ტელეკომპანია „ქართული არხის“ შემთხვევებზე, რომლებმაც სხვა არხების მიერ დაკვეთილი ეგზიტპოლის შედეგები გამოაქვეყნეს, კომუნიკაციების კომისიამ იმსჯელა, მაუწყებლების ვრცელი განმარტებები მოსმინა და სამართალდარღვევის ოქმი შედგენა საჭიროდ არ მიიჩნია.

მიუხედავად იმისა, რომ აღნიშნულ არხებს კომუნიკაციების კომისიამ სამართალდარღვევის ოქმი არ შეუდგინა, კომისიის თავმჯდომარემ და წევრებმა ცალსახად აღნიშნეს, რომ მაუწყებლებისთვის აღნიშნული საკითხის განხილვა უნდა იყოს სარეკომენდაციო სახის და მომავალში, თუნდაც მხოლოდ საინფორმაციო გამოშვებებში სხვა არხების დაკვეთილი ეგზიტპოლის გაშუქებისას, მაქსიმალურად დაიცვან ეგზიტპოლის გამოქვეყნების ყველა წესი.

საზოგადოებრივი მაუწყებლის აჭარის ტელევიზიის, „ტელეკომპანია პირველის“, „მეგა ტვ-ის“, „ტოკ ტვ-ის“, „პალიტრა ტვ-ის“ და „ტელეკომპანია ქართული არხის“ წარმომადგენლებმა დღეს გამართულ სხდომაზე ვრცლად ისაუბრეს და განაცხადეს, რომ სხვა არხების ეგზიტპოლის გაშუქება საინფორმაციო გამოშვებებში მაყურებლის ინფორმირების მიზნით მოახდინეს და კომისიას გადაწყვეტილების მიღების დროს აღნიშნული გარემოებების გათვალისწინება სთხოვეს.

„ჩვენ იმიტომ ვართ მედიის რეგულატორი, რომ კარგად ვიცით კონტექსტის გარჩევა და შეფასება, ვიცით, რა ითვლება ეგზიტპოლის გამოქვეყნებად და რა ითვლება მიმდინარე ამბების გაშუქებად. საინფორმაციო გამოშვებებში ეგზიტპოლის გაშუქება არ გამორიცხავს ეგზიტპოლის დარღვევით გამოქვეყნებას, „ტვ პირველის“ შემთხვევაში ორივეს ჰქონდა ადგილი. თუმცა, მთლიანი კონტექსტის გათვალისწინებით, სამართლებრივად დასაბუთებული გადაწყვეტილებით ოქმი არ შედგება, მაგრამ მაუწყებლებმა მათ საქმიანობაში გაითვალისწინონ დღევანდელი სხდომა და განხილვა. კომისიის შესაბამის დეპარტამენტებს ვთხოვ, რომ დღევანდელი მსჯელობა აქციონ დოკუმენტად და მისცენ მას სარეკომენდაციო სახე ყველა მაუწყებლისთვის, რათა მოხდეს წესებისა და მოთხოვნების დარღვევის პრევენცია“,- განაცხადა სხდომაზე კომუნიკაციების კომისიის თავმჯდომარემ.

დღეს გამართულ კომუნიკაციების კომისიის სხდომაზე 10 მაუწყებლის მიერ საარჩევნო კოდექსის დარღვევაზე მსჯელობის შემდეგ, კომისიის წევრების გადაწყვეტილებით, „მთავარი არხის“, „პალიტრა ტვ-ის“ და „ილიონ ტვ-ის“ საარჩევნო კოდექსის 50-ე მუხლის დარღვევის გამო ოქმი შეუდგინეს. მაუწყებლებმა კენჭისყრამდე 48 საათის განმავლობაში არჩევნებთან დაკავშირებული საზოგადოებრივი აზრის გამოკითხვის გამოქვეყნების წესი დაარღვიეს.

ტელეკომპანია „იმედის“ შემთხვევაში, მაუწყებლის მხრიდან დარღვეულია როგორც 48 საათიანი ვალდებულების დაცვის საკითხი, ისე ეგზიტპოლის გამოქვეყნებისას კანონით განსაზღვრული მოთხოვნები. კერძოდ, ეგზიტპოლის გამოქვეყნებისას „იმედის“ მიერ არ იყო მითითებული სავალდებულო ინფორმაცია, მათ შორის, შესაძლო ცდომილების ფარგლები და გამოკითხვის მეთოდი. რაც შეეხება ტელეკომპანია „ფორმულას,“ მან ეგზიტპოლის გამოქვეყნებისას, კანონით განსაზღვრული მოთხოვნები არ დაიცვა. კერძოდ, „ფორმულას“ მიერ არ იყო მითითებული კანონდებლობით განსაზღვრული სავალდებულო ინფორმაცია.

region
ავტ.: region ნოემბერი 5, 2020 20:35