მე მგონი, იმითაც ბედნიერი უნდა იყვნენ, რომ „ოცნების“ ხარჯზე არიან დღეს წარმოდგენილი საქართველოს პარლამენტში, – ამის შესახებ გახარიას თანაგუნდელ დეპუტატებთან დაკავშირებით, პარტია „ქართული ოცნების“ თავმჯდომარე ირაკლი კობახიძემ განაცხადა, რითაც უპასუხა ანა ბუჩუკურის განცხადებას, რომ მათ ფრაქციის შექმნის საშუალება არ ეძლევათ.
კობახიძის თქმით, ამის მიზეზი კონსტიტუციური ჩანაწერია.
„კონსტიტუცია იძლეოდა ბლოკებთან მიმართებით რეგლამენტის დონეზე განსხვავებული რეგულირების საშუალებას, ამის საშუალებას არ იძლეოდა იმ დეპუტატებთან მიმართებით, რომლებმაც დატოვეს კონკრეტული პარტია, არა ბლოკი, არამედ პარტია. ეს არის მიზეზი ანუ კონსტიტუციური ჩანაწერი არის ამის მიზეზი. მე მგონი, ისინი იმითაც ბედნიერი უნდა იყვნენ, რომ „ოცნების“ ხარჯზე არიან დღეს წარმოდგენილი საქართველოს პარლამენტში,“ – განაცხადა კობახიძემ.
