კობახიძე: ჩვენ გვჭირდება სტაბილურობა დემოკრატიულ პროცესებში და სწორედ ამას ემსახურება ის 5%-იანი ბარიერი, რომელიც საქართველოს კონსტიტუციით არის დადგენილი

„რეალურად ოპოზიციური პარტიები უყურებენ რეიტინგებს და ეს რეიტინგები მათ არ აძლევს ოპტიმიზმის საფუძველს. თუმცა ისინი ფიქრობენ, რომ თუ ბარიერი იქნება დაბლა დაწეული, „ნაცმოძრაობა“ და მისი „სატელიტი პარტიები“ ერთობლიობაში მოახერხებენ დაახლოებით იმდენი პროცენტის მიღებას, რამდენსაც „ქართული ოცნება“ მიიღებს“, – ამის შესახებ „ქართული ოცნების“ თავმჯდომარემ, ირაკლი კობახიძემ „იმედის კვირასთან“ საუბრისას განაცხადა. კობახიძის თქმით, პარლამენტი მხოლოდ ფორმალურად არის მრავალპარტიული და მრავალფეროვანი, რადგან, მისი მტკიცებით, თუ გამოვაკლებთ რამდენიმე დეპუტატს, დანარჩენი ოპოზიცია არის ე.წ. „კოლექტიური ნაცმოძრაობა“.

მანვე აღნიშნა, რომ „ლელო“, „გახარია“, ჯაფარიძის „გირჩი“ და ა.შ. არიან პოლიტიკური კლუბები, რომლებიც თავიდან ბოლომდე განეკუთვნებიან ე.წ. „კოლექტიურ ნაცმოძრაობას“.

„რაც შეეხება დაპირებას, ეს იყო პირობადადებული დაპირება და უკავშირდებოდა 2022 წლის დეკემბერში კანდიდატის სტატუსის მინიჭებას ჩვენი ქვეყნისთვის. მაშინ კონკრეტული ძალები ბლოკავდნენ საქართველოსთვის კანდიდატის სტატუსის მინიჭებას და ეს იყო გზავნილი არსებითად მათ მიმართ. რომ არ დაებლოკათ მათ 2022 წლის დეკემბერში კანდიდატის სტატუსის მინიჭება ჩვენი ქვეყნისთვის, ასეთ შემთხვევაში ჩვენ წავიდოდით ამ ნაბიჯზე, მიუხედავად იმისა, რომ ასეთი ნაბიჯი აძლიერებს კოლექტიურ „ნაცმოძრაობას”. გარდა ამისა, ითქვა, რომ თუ 2022 წლის დეკემბერში ჩვენ მოგვენიჭებოდა კანდიდატის სტატუსი, აღარ გაგრძელდებოდა ეს პოლარიზაციის კამპანია, რაც თავიდან ბოლომდე კანდიდატის სტატუსზე იყო მიბმული. თუმცა ეს არ გაითვალისწინეს შესაბამისმა ძალებმა“, – განაცხადა კობახიძემ. მანვე განაცხადა, რომ მთავარი სტაბილიზატორი პროპორციულ სისტემებში არის 5%-იანი საარჩევნო ბარიერი, რომელიც საქართველოს კონსტიტუციით არის დადგენილი და რომელიც ევროკავშირის უმეტეს წევრ ქვეყნებში მოქმედებს.

„ევროკავშირის წევრ ქვეყნებს რომ გადახედოთ, არის მხოლოდ და მხოლოდ 4 ქვეყანა, სადაც 3%-იანი ან უფრო დაბალი ბარიერი მოქმედებს. ეს არის ნიდერლანდები, დანია, ესპანეთი, იტალია. სხვა სახელმწიფოებში მოქმედებს 5%-იანი ან უფრო იშვიათად 4%-იანი ბარიერი, იმიტომ რომ პროპორციული სისტემის პირობებში, რაღაცამ უნდა დააბალანსოს ის პრობლემა რასაც ჰქვია შესაძლო არასტაბილურობა პოლიტიკურ სისტემაში და მთავარი სტაბილიზატორი პროპორციულ სისტემებში არის სწორედ 5%-იანი საარჩევნო ბარიერი. ჩვენც გვჭირდება ეს სტაბილიზატორი. ჩვენ გვჭირდება სტაბილურობა დემოკრატიულ პროცესებში და სწორედ ამას ემსახურება ის 5%-იანი ბარიერი, რომელიც საქართველოს კონსტიტუციით არის დადგენილი“, – განაცხადა ირაკლი კობახიძემ.

banner
წინა სტატიაშიბექა ოდიშარია – სალომე ზურაბიშვილმა დაიწყო ცალკე პოლიტიკური ცურვა, ეს ემსახურება გარკვეულ სამომავლო პოლიტიკურ გეგმებს, ჩვენთვის ეს ტრაგედია არ იქნება
შემდეგი სტატიაირაკლი კობახიძე – სალომე ზურაბიშვილი რაღაც მომენტში გახდა რადიკალური ოპოზიციის შემადგენელი ნაწილი, ჩაერთო კამპანიაში, რომელიც მიმართული იყო კანდიდატის სტატუსის წინააღმდეგ