დიდი ბრიტანეთის მიერ სამი ქართული კომპანიის დასანქცირების საკითხს გამოეხმაურა პარლამენტის ვიცე-სპიკერი ნინო წილოსანი. მისი მტკიცებით, ლონდონმა აღნიშნული კომპანიების შესახებ ინფორმაცია სწორედ ქართული საგამოძიებო უწყებებისგან მიიღო.
წილოსანის განცხადებით, დასანქცირებული სუბიექტები კრიპტო და უკანონო ფინანსურ ქსელებში იყვნენ ჩართულები და რუსეთს სანქციებისთვის გვერდის ავლაში ეხმარებოდნენ, რაზეც ქართულმა მხარემ რეაგირება მოახდინა.
„დიდმა ბრიტანეთმა მოაყოლა საპასუხო რეაქცია იმას, რაზეც ქართულმა სამართალდამცავმა უწყებებმა და შესაბამისმა ინსტიტუციებმა, ამ შემთხვევაში, ეროვნულმა ბანკმა კარგად იმუშავა“, — აცხადებს წილოსანი.
კითხვაზე, თუ რატომ არ იყო საზოგადოება წინასწარ ინფორმირებული ამ მასშტაბის სისხლის სამართლის საქმის შესახებ, დეპუტატმა უპასუხა, რომ ყველა მსგავს შემთხვევაზე საჯარო განცხადებების გაკეთება მიზანშეწონილი არ არის:
„ყველა სამართალდარღვევაზე რომ ბრიფინგი ჩატარდეს, ეს იქნება გასამხედროებული სახელმწიფოს რაღაცა რეალობა. ყველა სისხლის სამართლის საქმე არ მგონია, რომ ასე სადმე ქვეყნდებოდეს“, — განაცხადა ნინო წილოსანმა.
