თბილისში, ხუდადოვის ქუჩაზე 17 წლის დავით ნარიმანიძის დამამძიმებელ გარემოებებში მკვლელობის საქმეზე დაკავებულ არასრულწლოვანს, დ.პ.-ს, აღკვეთის ღონისძიების სახით პატიმრობა შეეფარდა.
აღნიშნული გადაწყვეტილება თბილისის საქალაქო სასამართლოს მოსამართლე ვალერიან ბუგიანიშვილმა მიიღო.
პროკურატურა ბრალდებულის მიმართ ყველაზე მკაცრი აღკვეთის ღონისძიების — პატიმრობის გამოყენებას ითხოვდა. პროკურორის შუამდგომლობას დაცვის მხარეც (ადვოკატები) დაეთანხმა.
დაკავებულ არასრულწლოვან დ.პ.-ს ბრალი საქართველოს სისხლის სამართლის კოდექსის 109-ე მუხლის „ვ“ ქვეპუნქტით (განზრახ მკვლელობა ხულიგნური ქვენა გრძნობით) აქვს წარდგენილი.
აღნიშნული მუხლი სასჯელის სახით 20 წლამდე თავისუფლების აღკვეთას ითვალისწინებს.
