ჰაიტის სამართალდამცველებმა ოთხი დაქირავებული მკვლელის ლიკვიდაცია მოახდინეს, რომლებიც ქვეყნის პრეზიდენტის ჟოვენელ მოიზას მკვლელობაში იყვნენ ეჭვმიატნილი – ქვეყნის ეროვნული პოლიციის ხელმძღვანელმა ლეონ შარლმა განაცხადა.
მოიზი გუშინ საკუთარ რეზიდენციაში სასიკვდილოდ დაჭრეს, მისი მეუღლე მარტინიც მძიმედ დაიჭრა. აშშ-ში ჰაიტის ელჩმა ბოკჩიტ ედმონდმა გავრცელებული ინფორმაცია იმის შესახებ, რომ პირველი ლედი გარდაიცვალა უარყო. დიპლომატმა მის მდგომარეობას კრიტიკული, მაგრამ სტაბილური უწოდა.
პრეზიდენტზე თავდასხმის შესახებ რამდენიმე დეტალი უკვე ცნობილია. ქვეყნის პრემიერ-მინისტრმა კლოდ ჟოზეფმა განაცხადა, რომ თავდამსხმელები უცხოელები იყვნენ და საუბრობდნენ ინგლისურად და ესპანურად. მან, ასევე თქვა, რომ თავდამსხმელებმა საკუთარი თავი წარადგინეს, როგორც აშშ-ს ნარკოტიკებთან ბრძოლის სამმართველოს (DEA) აგენტები, მაგრამ ხაზი გაუსვა, რომ არ სჯერა მათი სიტყვების. აშშ-ს სახელმწიფო დეპარატმენტის პრეს-მდივანმა ნედ პრაისმა მომხდართან აშშ-ს რაიმე სახით კავშირი უარყო.
მეზობელი დომინიკის რესპუბლიკის ხელისუფლების ინფორმაციით, თავდამსხმელთა ჯგუფი ოთხი კოლუმბიელისგან და სამი ვენესუალელისგან შედგებოდა, რომლებიც ჰაიტის ნარკო-დაჯგუფების წევრები იყვნენ.
ჰაიტი მსოფლიოში ყველაზე ღარიბი ქვეყანაა. ქვეყნის 4,4 მილიონი მოსახლე მხოლოდდამხოლოდ ჰუმანიტარული დახმარების იმედზეა.
