ხავიერ კოლომინა: ბოლო ექვს თვეში მიღებული ზოგიერთი გადაწყვეტილება, მაგალითად, ხელისუფლების მიერ 19 აპრილის შეთანხმების დატოვების შესახებ მიღებული გადაწყვეტილება, იყო აღქმული შეშფოთებით

ყურადღებით ვაკვირდებით საქართველოს შიდაპოლიტიკურ პროცესებს, მათ შორის პოლარიზაციას, იმ ფაქტს, რომ ბოლო ექვს თვეში მიღებული ზოგიერთი გადაწყვეტილება, მაგალითად, ხელისუფლების მიერ 19 აპრილის შეთანხმების დატოვების შესახებ მიღებული გადაწყვეტილება, იყო აღქმული შეშფოთებით, – ამის შესახებ სამხრეთ კავკასიასა და ცენტრალურ აზიაში ნატო-ს გენერალური მდივნის სპეციალურმა წარმომადგენელმა, ხავიერ კოლომინამ განაცხადა.

„ნატო არის პოლიტიკური და სამხედრო ორგანიზაცია, მაგრამ ნატო-ს სადამფუძნებლო, ვაშინგტონის შეთანხმების პრეამბულა მოიცავს ამ ღირებულებებს, დემოკრატიასა და ადამიანის უფლებებს, ეს ფუნდამენტური საკითხებია. ნატო-ს გაფართოების პოლიტიკა მიმართულია დემოკრატიისა და კანონის უზენაესობის გაძლიერებისკენ, განსაკუთრებით ყოფილი ვარშავის პაქტის ქვეყნებში და ბოლო 20 წლის განმავლობაში ნატო-ს წევრობის პერსპექტივა გამოყენებული იყო რეფორმების დაჩქარებისთვის, რასაც ამ ქვეყნებისგან ვითხოვდით. ეს იყო ძალიან პოზიტიური დამაჩქარებელი და ინიციატივა იმ ქვეყნებისთვის, რომელთაც ნატო-ს წევრობა სურდათ. ამან დიდი წვლილი შეიტანა ევროპის სტაბილურობასა და კეთილდღეობაში“, – აღნიშნა ხავიერ კოლომინამ.

მისივე თქმით, მოკავშირეები ყურადღებით აკვირდებიან ნატო-ს ასპირანტი ქვეყნის, საქართველოს მიერ წარსულში გატარებულ რეფორმებს.

„ჩვენ გვაქვს დოკუმენტი, რომელიც პოლიტიკურია. ამას ჰქვია წლიური ეროვნული პროგრამა, რომელიც მოიცავს ყველა პოლიტიკურ ელემენტს. ჩვენ ძალიან ღია ვართ მეგობრებთან ურთიერთობებში და ყურადღებით ვაკვირდებით საქართველოს შიდაპოლიტიკურ პროცესებს, მათ შორის პოლარიზაციას, იმ ფაქტს, რომ ბოლო ექვს თვეში მიღებული ზოგიერთი გადაწყვეტილება, მაგალითად, ხელისუფლების მიერ 19 აპრილის შეთანხმების დატოვების შესახებ მიღებული გადაწყვეტილება, იყო აღქმული შეშფოთებით. ასევე, საჭიროა მეტი ძალისხმევა მართლმსაჯულების რეფორმაზე, მედიათავისუფლებისა და უსაფრთხოების სამსახურების ანგარიშვალდებულებასთან დაკავშირებით“, – განაცხადა კოლომინამ.

​მისი თქმით, ნატო ყურადღებით აკვირდება საქართველოში არსებულ ვითარებას.

„საბოლოოდ ჩვენ ვხედავთ, რომ ნატო-სთან ინტეგრაციის პროცესები ნამდვილად რთულია ყველა პარტნიორისთვის. პოლარიზებულ პოლიტიკურ გარემოს შეუძლია, ხელი შეუშალოს მთავრობას საჭირო რეფორმების გატარებაში. ჩვენ სიტუაციას ყურადღებით ვადევნებთ სიტუაციას თვალს და როგორც შეგვიძლია, მხარს ვუჭერთ ძალისხმევას. სწორედ ამიტომ ვინარჩუნებთ ახლო ურთიერთობას საქართველოს მთავრობასთან. მე ვნახე საქართველოს საგარეო საქმეთა მინისტრი დავით ზალკალიანი და მინისტრის მოადგილე ლაშა დარსალია გასულ კვირას და ამ საკითხებზე ვესაუბრე. ჩვენ არ ვმალავთ არაფერს ჩვენი ქართველი მეგობრებისგან. პირიქით, ღიად ვსაუბრობთ ამაზე. ჩვენ ველოდებით, რომ საქართველოს მთავრობა მიაღწევს ისეთ პროგრესს, როგორიც ჩვენ გვსურს, ვიხილოთ. ეს ფუნდამენტური საკითხია. ეს „ნატო 2030“-ის ფუნდამენტური საკითხია, ეს იქნება ახალი სტრატეგიული კონცეფციის ფუნდამენტური საკითხი“, – აღნიშნა ხავიერ კოლომინამ.

banner
წინა სტატიაშიხავიერ კოლომინა: საქართველოს ტერიტორიულ მთლიანობას ყველამ პატივი უნდა სცეს და ეს არის ნატო-ს ერთ-ერთი მთავარი გზავნილი
შემდეგი სტატიასაგადასახადო დოკუმენტების გაყალბების, ბიუჯეტის დიდი ოდენობით ქონებრივი დაზიანებისა და ქონების გადამალვის საქმეზე სამი პირი დააკავეს