ხაინდრავა მეუფე ნიკოლოზ ფაჩუაშვილს – სააკაშვილის საქმიანობას დავით აღმაშენებლის და დემეტრე თავდადებულის ღვაწლს რომ გაუტოლებ, ასე მგონია, არც ქართულ ეკლესიას უნდა სცემდე პატივს და არც მის მრევლს

„საცნაურ არსს გზანი უფლისანი“ – ასე არ არის მეუფე ნიკოლოზ? საჯაროდ მოგმართავთ იმიტომ, რომ თქვენი განცხადებაც საჯარო იყო. ორმოცდღიანი მშრალი მარხვა რომ 39 დღით განისაზღვრება და ხბოს ღვიძლის შეზავებული ფაფის მიღებით შეინახება, ეს თქვენგან გავიგე პირველად, – რეჟისორი გოგა ხაინდრავა მეუფე ნიკოლოზ ფაჩუაშვილს მიმართავს, რომელიც დღეს მიხეილ სააკაშვილთან სასჯელაღსრულების დაწესებულებაში იმყოფებოდა და ყოფილი პრეზიდენტი აზიარა.

„პრეზიდენტყოფილი საკუთარ ეროვნებასა და ქვეყნის მოქალაქეობაზე უარს რომ იტყვი და პროდუქტის გადასატანი მაცივრით ქვეყანაში შემოიპარები, ეს რომ „დიდი ღვაწლი და მსხვერპლი“ ყოფილა „ქვეყნის თავისუფლებისთვის და გაძლიერებისთვის“, ესეც თქვენგან გავიგე პირველად. „მშრალი მარხვის“ ყველა დღეს საზოგადოების და ოპონენტების შეურაცმხყოფელ უსტარებს რომ აგზავნი ციხიდან, ესეც თუ „ერთმანეთის სიყვარულისთვის და სიძულვილის ენის სამუდამოდ დავიწყებისთვის“ შეიძლება იყოს გამიზნული, ესეც თქვენგან გავიგე პირველად. მიშა სააკაშვილს, მის წარსულ და აწმყო საქმიანობას დავით მეფსალმუნის, დავით აღმაშენებლის და დემეტრე თავდადებულის ღვაწლს რომ გაუტოლებ, მაპატიოს უფალმა, მაგრამ ასე მგონია, არც შენ წარსულს უნდა სცემდე პატივს და არც მომავალს; არც შენს ერს, არც ქართულ სახელმწიფოს; არც ქართულ მართლმადიდებელ ეკლესიას და არც მის მრევლს!

და ბოლოს, დღეს საღამოს, მშრალი მარხვით „ნამარხულევი“ და თქვენგან ნაზიარები მიშა სააკაშვილის მიერ დამოძღვრილი ზონდერები, „სიყვარულისა და სიძულვილის ენის სამუდამოდ დავიწყების“ საბაბით და „ქვეყნის თავისუფლებისა და გაძლიერებისთვის“ პოლიციას რომ შეუტევენ და ჩვენს ქვეყანაში დესტაბილიზაციის ახალი კერების მოწყობას შეეცდებიან, იქნება მაშინ დაფიქრდეთ იმაზე, რომ მღვდელმთავრის მაღალი წოდება უდიდესი პასუხისმგებლობაა, ეკლესიის, ერის, მრევლის და უფლის წინაშე!“,- აღნიშნულია გოგა ხაინდრავას მიმართვაში.

წინა სტატიაშიელენე ხოშტარია ცუდად გახდა
შემდეგი სტატიამინაშვილი – ამ ვითარებაში „ქართულ ოცნებასთან“ მოლაპარაკებაზე საუბარი არის ძალიან რთული