კატარმა და ირანმა თავიანთ პორტებს შორის საზღვაო სავაჭრო მიმოსვლის აღდგენის შესახებ განაცხადეს. კატარის ტრანსპორტის სამინისტროს განცხადებით, რომელიც სოციალურ ქსელ X-ზე გამოქვეყნდა, საზღვაო აქტივობები დაუყოვნებლივ განახლდება.
ირანული სახელმწიფო მედიის ინფორმაციით, ირანული საქონლისთვის კატარის ალ-რუვაისის პორტი გაიხსნა და ორ ქვეყანას შორის საზღვაო ვაჭრობა აღდგა. აღსანიშნავია, რომ მარშრუტი ალ-რუვაისსა და ირანის დაირის პორტს შორის სპარსეთის ყურეში ყველაზე მოკლე კომერციულ საზღვაო გზას წარმოადგენს.
ერთი კვირის წინ, სამხრეთ ყურეში ნაოსნობასთან დაკავშირებით განახლებული დაძაბულობის ფონზე, კატარის საამირომ ყველა გემს მოუწოდა, მომდევნო შეტყობინებამდე შეეწყვიტათ ნაოსნობა და საზღვაო საქმიანობა. კატარი ირანსა და აშშ-ს შორის ერთ-ერთი მთავარი მედიატორია და ყურეში არსებული კონფლიქტის დასასრულებლად მუდმივად დიალოგისკენ მოუწოდებს მხარეებს.
