გამოცემა „მთავარი ამბები კახეთიდან“ იუწყება, რომ დედოფლისწყაროსა და ახმეტის მუნიციპალიტეტებში სტიქიის შედეგად მიყენებული ზარალის სალიკვიდაციო სამუშაოები მიმდინარეობს.
არსებული ინფორმაციით, დედოფლისწყაროს მუნიციპალიტეტის სოფელ გამარჯვებაში ძლიერმა ქარმა 8 საცხოვრებელ სახლს სახურავი ნაწილობრივ გადახადა. სტიქიამ ასევე მოგლიჯა მრავალწლოვანი ხეები, რის გამოც საავტომობილო გზებზე მოძრაობა დროებით შეიზღუდა.
ახმეტის მუნიციპალიტეტის სოფელ მატანში კი უხვმა ნალექმა პრობლემები შექმნა — სანიაღვრე არხებმა წყლის დიდი ნაკადი ვეღარ გაატარა, რის გამოც რამდენიმე საცხოვრებელი სახლი დაიტბორა. ორივე მუნიციპალიტეტში ამ დროისთვის ზარალის ზუსტ ოდენობას ადგენენ.
