კახეთში, სოფელ ართანასთან გაჩენილი ტყის ხანძრის ლოკალიზება კვლავაც ვერ ხერხდება. ცეცხლი უკვე დაბლა, დასახლებული ტერიტორიისკენ მიიწევს. მეტყევეების ცნობით, ადგილზე ცეცხლის 10-მდე აქტიური კერაა, მიუდგომელი რელიეფი კი, სახანძრო სამუშაოებს უკიდურესად ართულებს.
კოხტას მთებში გაჩენილი ხანძრის ჩაქრობას 500-ზე მეტი მეხანძრე-მაშველი, რეინჯერი და ავიაცია უკვე მესამე დღეა უშედეგოდ ცდილობს.
განადგურებულია რამდენიმე ათეული ჰექტარი ტყე.
სამაშველო სამსახურის წარმომადგენლის თქმით, ცოცხალ ძალასთან ერთად, ხანძრის ჩაქრობაში ჩართულია ავიაცია – ერთი ქართული და ორი ირანული ვერტმფრენი.
ადგილობრივების ნაწილი ხანძრის ხელოვნურად გაჩენის ვერსიას არ გამორიცხავს. ნაწილი კი, ეთანხმება მოსაზრებას, რომ მეხი ჩამოვარდა, რამაც ხანძარი გამოიწვია.
