კახა კალაძე – „ნაციონალური მოძრაობა“ აჩვენებდა, როგორი არ უნდა ყოფილიყო ხელისუფლება, დღეს კი გვაჩვენებენ, როგორი არ უნდა იყოს ოპოზიცია

region
ავტ.: region დეკემბერი 25, 2018 19:12

კახა კალაძე – „ნაციონალური მოძრაობა“ აჩვენებდა, როგორი არ უნდა ყოფილიყო ხელისუფლება, დღეს კი გვაჩვენებენ, როგორი არ უნდა იყოს ოპოზიცია

„ნაციონალური მოძრაობა“ როდესაც ხელისუფლებაში იყო, აჩვენებდა, როგორი არ უნდა ყოფილიყო ხელისუფლება, დღეს კი გვაჩვენებენ, როგორი არ უნდა იყოს ოპოზიცია, – ამის შესახებ დედაქალაქის მერმა, კახა კალაძემ საკრებულოს სხდომაზე განაცხადა.

კახა კალაძემ „ნაციონალური მოძრაობის“ წევრის, ლევან ხაბეიშვილის კითხვას უპასუხა და აღნიშნა, რომ რაჭაში მოხდა პირადი დაპირისპირება და აქ პოლიტიკა არაფერ შუაშია.

„ლევან ხაბეიშვილი რომ რეპრესიებზე დასვამს კითხვას, ეს არის მაგალითი, თუ როგორი არ უნდა იყო ოპოზიცია. როდესაც „ნაციონალური მოძრაობა“ ხელისუფლებაში იყო, გვაჩვენებდნენ, როგორი არ უნდა ყოფილიყო ხელისუფლება, როგორ არ უნდა მართო ქვეყანა. დღეს გვაჩვენებს, როგორი არ უნდა იყოს ოპოზიცია. რაჭაში მომხდართან პოლიტიკა არაფერ შუაშია. სრული პასუხისმგებლობით ვაცხადებ, რომ ეს იყო ორ ადამიანს შორის დაპირისპირება. მოხდა სამწუხარო ფაქტი. ერთი არის დაჭრილი და მძიმე მდგომარეობაშია. ცხადია, ეს ძალიან მძიმეა, მაგრამ ყველაზე დიდი უბედურება და მწუხარება ის არის, რომ პოლიტიკური სარჩულის მიკერებას ცდილობს „ნაციონალური მოძრაობის“ წარმომადგენელი ხაბეიშვილი“, – განაცხადა კახა კალაძემ.

ონში მიმდინარე წლის ნოემბერში “ნაციონალური მოძრაობის” საარჩევნო შტაბის უფროსი ნოდარ ბურდილაძე დაჭრეს. განზრახ მკვლელობის მცდელობის ბრალდებით დაკავებულია ერთი პირი. შს სამინისტროს ცნობით, გამოძიებით დადგენილია, რომ დანაშაული ურთიერთშელაპარაკების ნიადაგზე მოხდა. ამასთან, დანაშაულის შემსწრე დაცვის პოლიციის თანამშრომელს გამოძიების დასრულებამდე სამსახურებრივი უფლებამოსილება შეუჩერდა.

region
ავტ.: region დეკემბერი 25, 2018 19:12