ამერიკის შეერთებული შტატების პრეზიდენტი ჯო ბაიდენი ხუთშაბათს, 19 მაისს თეთრ სახლში შვედეთის პრემიერ-მინისტრს და ფინეთის პრეზიდენტს უმასპინძლებს. ინფორმაციას ტელეკომპანია „სიენენი“ თეთრ სახლზე დაყრდნობით ავრცელებს.
„სიენენის“ ცნობით, შეხვედრის დროს განხილვის მთავარი თემა შვედეთისა და ფინეთის ნატო-ში გაწევრიანების საკითხი იქნება, ასევე ლიდერები ისაუბრებენ ევროპის უსაფრთხოებაზე და უკრაინაში რუსეთის შეჭრაზე.
შვედეთმა და ფინეთმა ნატო-ში გაწევრიანების სურვილი, რუსეთის უკრაინაში შეჭრის შემდეგ დააფიქსირეს. აშშ-ის და ნატო-ს წევრი სახელმწიფოების ლიდერებმა ფინეთისა და შვედეთის ამ გადაწყვეტილებისადმი მხარდაჭერა ღიად გამოხატეს.
