ჯანდაცვის მინისტრი : შეზღუდვების გადახედვა ვერ მოხდება

ჯანდაცვის მინისტრის ეკატერინე ტიკარაძის განცხადებით, თუ ბიზნეს სექტორს, რაიმე დამატებით კითხვები აქვთ, ჯანდაცვის სამინისტრო ეკონომიკურ გუნდთან ერთად მათ შეხვდება, თუმცა, შეზღუდვების გადახედვა არ მოხდება. აღნიშნულის შესახებ ტიკარაძემ მთავრობის ადმინისტრაციაში ჟურნალისტებს განუცხადა, რითაც, ბიზნეს სექტორის მოთხოვნებს გამოეხმაურა.

„ბიზნეს სექტორთან ეკონომიკური ჯგუფის მხრიდან გაიმართა არაერთი შეხვედრა, ასევე, ჩართული იყო ჯანდაცვის სამინისტრო და ეპიდემიოლოგების გუნდი, ასევე ჩართული გვყავდა საერთაშორისო ექსპერტები და დეტალურად მოხდა საუბარი, გვქონდა ახსნა-განმარტება თუ რატომ არის დღესდღეობით ასე მნიშვნელოვანი, რომ მივმართოთ კონკრეტულად ამ შეზღუდვებს. რაც შეეხება შეღავათებს, ამაზე ეკონომიკური გუნდი მუშაობს და მათ უკვე განუმარტეს თუ რა შეღავათების საშუალება არსებობს. თუ დამატებითი კითხვები არსებობს, რა თქმა უნდა, ეკონომიკური გუნდიც და ჯანდაცვის სამინისტროც შეხვდება მათ და გასცემს მათ კითხვებს პასუხს.

შეზღუდვების გადახედვა ვერ მოხდება, რადგან ამასთან დაკავშირებით ჩატარდა არაერთკვირიანი შრომა და დაკვირვება. ჩვენ ზუსტად ვიცით, რომ ეს არის ის შეზღუდვები, რომელიც საქართველოს მოსახლეობას ჯანმრთელობის უსაფრთხოების კუთხით ესაჭიროება,“- განაცხადა ტიკარაძემ.

banner
წინა სტატიაშიიუსტიციის სახლი განცხადებით პასუხობს კრიტიკას, რომელიც 25 ლარიანი ვაუჩერების სოციალურ პროექტს მოჰყვა
შემდეგი სტატიაანზორ ბიწაძე : სასამართლოში პოლიტიკური ლიდერების წინააღმდეგ საქმეების განახლება „ივანიშვილის ბოროტი ტაქტიკაა“