პარლამენტის ჯანმრთელობის დაცვისა და სოციალურ საკითხთა კომიტეტმა მთავრობის მიერ წარმოდგენილი 2025 წლის სახელმწიფო ბიუჯეტის შესრულების წლიური ანგარიში განიხილა. მომხსენებლის, გიორგი კაკაურიძის ინფორმაციით, გასულ წელს ეკონომიკური ზრდის რეალურმა მაჩვენებელმა 7.5% შეადგინა, ხოლო მთლიანმა შიდა პროდუქტმა (მშპ) ნომინალურ გამოხატულებაში 104 მილიარდ 598 მილიონ ლარს მიაღწია (ერთ სულ მოსახლეზე — 28 235 ლარი).
ამასთანავე, 2024 წელთან შედარებით სავაჭრო ბრუნვა 10,3%-ით გაიზარდა და 25 მილიარდ 863 მილიონი დოლარი შეადგინა. ბიუჯეტის ხარჯვითი ნაწილი კი 99.2%-ით შესრულდა (27 მილიარდ 723 მილიონი ლარი).
ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს მიერ ბიუჯეტის ათვისების მაჩვენებელმა 100,3% შეადგინა, რაც ჯამში 8 მილიარდ 976 მილიონ ლარზე მეტია. თანხები უწყებებს შორის ასე გადანაწილდა:
სოციალური პროგრამები: ათვისებულია 6 მილიარდ 327 მილიონი ლარი (შესრულება — 100%);
ჯანდაცვის პროგრამები: ათვისებულია 2 მილიარდ 154 მილიონი ლარი (შესრულება — 100,7%);
დევნილთა და მიგრანტთა ხელშეწყობა: ათვისებულია 246 მილიონ ლარამდე (შესრულება — 99,8%);
დასაქმების სისტემა: ათვისებულია 108 მილიონ 979 ათასი ლარი (შესრულება — 99,9%).
