საქართველოში დემოკრატიის ინდექსი გაუარესდა – გარდამავალ ეტაპზე მყოფ სახელმწიფოებთან დაკავშირებით მორიგ ანგარიშს “Freedom House” აქვეყნებს.
ყოველწლიური კვლევის მიხედვით, გასულ წელს საქართველოს დემოკრატიული პროგრესის რეიტინგში, სადაც შვიდ ქულიან სისტემაში უმაღლესი 1 ქულაა – საქართველოს 4, 68 მეასედი აქვს, რაც შარშანდელთან შედარებით დაბალია.
დოკუმენტის მიხედვით, წელს საქართველომ პოზიციები მედიის თავისუფლებისა და ადგილობრივი დემოკრატიული მმართველობის საკითხებში დათმო. კვლევაში ნათქვამია:
“საქართველოში მილიარდერი ბიძინა ივანიშვილი 2013 წელს, ერთწლიანი მმართველობის შემდეგ პრემიერ-მინისტრის პოსტიდან გადადგა, თუმცა მმართველს პარტიაზე კონტროლს ინარჩუნებს. ივანიშვილის პოლიტიკური ვენდეტები და თბილისის განვითარების გეგმა კვლავ ტვირთად აწევს ქართულ პოლიტიკას”- წერია დოკუმენტში.
„Freedom House“-ის ანგარიშში საქართველო გარდამავალი ანუ ჰიბრიდული რეჟიმების სიაშია, სადაც როგორც წესი, საარჩევნო დემოკრატია არსებობს, თუმცა სუსტია დემოკრატიული ინსტიტუტები – მნიშვნელოვანი გამოწვევები ადამიანის უფლებებისა და სამოქალაქო თავისუფლებების დაცვის კუთხით.
