ისრაელი გაერო-ს გენერალურ მდივანთან, ანტონიუ გუტერეშთან ყველანაირ ოფიციალურ კონტაქტს წყვეტს. გაერო-ში ისრაელის ელჩმა, დენი დანონმა განაცხადა, რომ თელ-ავივის ამ რადიკალური გადაწყვეტილების მიზეზი საერთაშორისო ორგანიზაციის მიერ ისრაელის იმ „შავ სიაში“ შეყვანა გახდა, სადაც კონფლიქტის ზონებში სექსუალურ ძალადობაში სავარაუდო ბრალდებული ქვეყნები ხვდებიან.
ელჩმა გაერო-ს ნაბიჯს „აღმაშფოთებელი“ უწოდა და ხაზგასმით აღნიშნა, რომ ბოიკოტი გაგრძელდება მანამ, ვიდრე ორგანიზაციას გუტერეში ხელმძღვანელობს:
„ჩვენ დავიღალეთ გენერალური მდივნის ტყუილებით. დემოკრატიული ისრაელის სახელმწიფოს გაიგივება „ჰამასის“ ტერორისტებთან ახალი დაბალი დონეა. ისრაელი იცავს თავის მოქალაქეებს, მაშინ როცა „ჰამასი“ ხოცავს, აუპატიურებს და იტაცებს ადამიანებს“, — განაცხადა დენი დანონმა.
გენერალური მდივნის ოფიციალური წარმომადგენელი სტეფან დიუჟარიკის განცხადებით, მიუხედავად თელ-ავივის პოზიციისა, გაერო-ს მხრიდან მოლაპარაკებების კარი ღია რჩება.
