ირანის სამხედრო ცენტრალურმა ოპერატიულმა სარდლობამ, Khatam Al-Anbiya-მ განაცხადა, რომ მათ იერიში მიიტანეს არაბთა გაერთიანებულ საამიროებში მდებარე უკრაინული ანტი-დრონების სისტემების დეპოზე. თეირანის მტკიცებით, ეს ტექნიკა აშშ-ის ძალების დასახმარებლად გამოიყენებოდა.
ირანული მხარის თქმით, ეს სისტემები ამერიკელი სარდლებისა და ჯარისკაცების „სამალავების“ დასაცავად იყო განთავსებული.
საგულისხმოა, რომ რამდენიმე საათით ადრე, უკრაინის პრეზიდენტი ვოლოდიმირ ზელენსკი არაბთა გაერთიანებულ საამიროებში მოულოდნელი ვიზიტით იმყოფებოდა, სადაც თავდაცვის სფეროში თანამშრომლობაზე შეთანხმდა.
ეს პირველი შემთხვევაა, როდესაც ირანი ღიად ადასტურებს უკრაინული სამხედრო აქტივების განადგურებას მესამე ქვეყნის ტერიტორიაზე. დუბაიზე მიტანილი იერიში კი ნიშნავს, რომ საამიროები, რომელიც აქამდე რეგიონის ყველაზე უსაფრთხო ჰაბად ითვლებოდა, ომის ცხელ ზონაში მოექცა.
