ირანის ხელისუფლებამ 466 პირის დაკავების შესახებ გამოაცხადა, რომლებსაც ბრალად ონლაინ აქტივობის მეშვეობით ქვეყნის დესტაბილიზაციის მცდელობა ედებათ — ამის შესახებ სახელმწიფო მედია აშშ-სა და ისრაელთან მიმდინარე ომის ფონზე იტყობინება.
„ეს პირები ინტერნეტის საშუალებით ცდილობდნენ საზოგადოებრივ აზრში დაბნეულობის დათესვას, შიშისა და შფოთვის გაღვივებას, უსაფრთხოების განცდის შელახვასა და მტრის სასარგებლოდ პროპაგანდის გავრცელებას“, — იტყობინება სახელმწიფო საინფორმაციო სააგენტო IRNA ირანის პოლიციაზე დაყრდნობით.
სააგენტოს არ დაუკონკრეტებია არც ონლაინ აქტივობის ზუსტი შინაარსი და არც დაკავების თარიღები.
მას შემდეგ, რაც 28 თებერვალს, აშშ-ისა და ისრაელის დარტყმების შედეგად ომი დაიწყო, ირანის ხელისუფლებამ ინტერნეტი სრულად გათიშა.
ინტერნეტ-მონიტორინგის პლატფორმა Netblocks-ი სოციალურ ქსელ X-ში წერს, რომ „ირანში ინტერნეტის ბლოკადა უკვე 25-ე დღეა გრძელდება და მან 576 საათს მიაღწია“.
თითქმის ერთი თვეა, ირანში გლობალურ ქსელზე წვდომა მხოლოდ რამდენიმე უფლებამოსილ პირს აქვს. სხვები ბლოკადის გვერდის ავლით ინტერნეტთან დაკავშირებას სპორადულად, VPN-ის ან Starlink-ის მეშვეობით ცდილობენ, რაც ირანში პატიმრობით ისჯება.
