ირანის შაჰის, მოჰამედ რეზა ფეჰლევის ქვრივი მიმართვას ავრცელებს: მალე თქვენ ერთად ვიზეიმებთ თავისუფლებას ირანში
ჩემო ძვირფასო თანამემამულენო,
ამ დღეებში თქვენმა სიმამაცემ, პატრიოტიზმმა და თავგანწირვამ მსოფლიო ხალხების პატივისცემა დაიმსახურა და სხვადასხვა ქვეყანაში მილიონებმა ღიად გამოხატეს თქვენდამი მხარდაჭერა. ვიცი, რომ ისინი, ვინც სიბნელით იკვებებიან და თქვენი ხმის მოსმენის ეშინიათ, ცდილობენ, გაწყვიტონ თქვენი კავშირი გარე სამყაროსთან. მაგრამ თქვენი ხმა ბევრად უფრო ძლიერია, ვიდრე ის, რაც ასეთი ქმედებებით შეიძლება დადუმდეს. მტკიცედ მჯერა, რომ თქვენი პროტესტის ეპიკური სცენები ადრე თუ გვიან გაარღვევს ცენზურის კედელს და ის ნამდვილი მასშტაბი, რაც ამ დღეებში აჩვენეთ, მთელ მსოფლიოში კიდევ უფრო დიდ გაოცებასა და აღფრთოვანებას გამოიწვევს.
ბოლო საათებში, კომუნიკაციის საშუალებების გათიშვის ფონზე, გარესამყარომდე მიღწეულმა კადრებმა ირანში უდანაშაულო მომიტინგეთა მკვლელობის შესახებ, როგორც დედას, გული დამიმსხვრია. ამ ერის თითოეული შვილის დაღვრილი სისხლი ჩემთვის კვლავ აღვიძებს საკუთარი შვილების დაკარგვით გამოწვეულ აუტანელ ტკივილს. მოთმინებასა და სიძლიერეს ვუსურვებ ირანის დედებსა და მამებს და ვთვლი, რომ მათთან ერთად ვგლოვობ. გულწრფელ სამძიმარს ვუცხადებ ყველა თანამემამულეს, ვინც ამ ეროვნული აჯანყების დროს საყვარელი ადამიანები დაკარგა, და ჯანმრთელობასა და გამოჯანმრთელებას ვუსურვებ ამ დღეებში დაშავებულებსა და დაჭრილებს.
ირანის ისტორიის ამ კრიტიკულ ეტაპზე, კიდევ ერთხელ მივმართავ ირანის შეიარაღებულ ძალებს: გახსოვდეთ, რომ არც ერთი ხელისუფლების გადარჩენა და არც ერთი ინტერესის დაცვა არ ამართლებს თქვენი თანამემამულეების წინააღმდეგ სისხლის დაღვრას. მოუსმინეთ პროტესტის ყვირილსა და ხალხის მრისხანე ხმას. სანამ გვიან არ არის, შეუერთდით თქვენს ძმებსა და დებს და ნუ დაუკავშირებთ საკუთარ ბედს მკვლელთა ბედს. ხვალინდელი თავისუფალი ირანი თქვენს შვილებსაც ეკუთვნით — თანამემამულეთა სისხლის დაღვრით ნუ გაანადგურებთ საკუთარ მომავალს და თქვენი ოჯახების მომავალს. იცოდეთ, რომ ამ დღეების ისტორია ჩვენს ირანში სამუდამოდ ჩაიწერება ისტორიის ფურცლებზე, ხოლო სირცხვილი დარჩება მათთვის, ვისი ტყვიებიც მათი ძმებისა და დების მკერდს ხვრეტდა.
და ბოლოს: ჩემო შვილებო, შეინარჩუნეთ იმედი. იყავით ძლიერები და ირწმუნეთ, რომ მალე თქვენ ერთად იზეიმებთ თავისუფლებას ირანში და რომ სინათლე სიბნელეს სძლევს.
ფარაჰ ფეჰლავი
