ირაკლი კოვზანაძე: ეკონომიკა ჯერ კიდევ პანდემიის „ტყვეობაშია“

„ეკონომიკის ზრდის პერსპექტივები და აქედან გამომდინარე შედეგები დამაიმედებელია. თუმცა პირდაპირ ვიტყვი, რომ ეკონომიკა ჯერ კიდევ პანდემიის ,,ტყვეობაშია“ და დღეს პანდემიის სწორ მართვაზე გადის ქვეყნის ეკონომიკური წინსვლა და მოსახლეობის კეთილდღეობა. ამ მიმართულებით კი წვლილი თითოეულმა ჩვენგანმა, თითოეულმა მოქალაქემ უნდა შეიტანოს. ასევე კრიტიკულად მნიშვნელოვანია ამ მიმართულებით გამოყოფილი თითოეული თეთრის რაციონალური ხარჯვა, რასაც ჩვენ აუცილებლად გავაკონტროლებთ“, – ამის შესახებ პარლამენტის საფინანსო-საბიუჯეტო კომიტეტის თავმჯდომარე ირაკლი კოვზანაძემ პლენარულ სესიაზე სიტყვით გამოსვლისას განაცხადა, სადაც 2021 წლის სახელმწიფო ბიუჯეტში ცვლილებები განიხილეს.

თანამომხსენებლის განცხადებით მშპ-ს დაგეგმილზე მაღალი ტემპით ზრდამ მისცა შესაძლებლობა მთავრობას და ფინანსთა სამინისტროს გადაეხედა 2021 წლის ბიუჯეტისათვის და წარმოედგინა სახელმწიფო ბიუჯეტის კანონში შესატანი ცვლილებების კანონპროექტი.

საქართველოს პარლამენტის საზოგადოებასთან ურთიერთობის სამსახურის ინფორმაციით, ირაკლი კოვზანაძემ აქცენტი გააკეთა საქართველოს ეკონომიკის აპრილიდან მკვეთრად გაშლაზე და იმედი გამოთქვა, რომ ბოლო თვეების ეკონომიკური ზრდის მაჩვენებლების გათვალისწინებით, დინამიკური ზრდა გაგრძელდება.

საფინანსო-საბიუჯეტო კომიტეტის თავმჯდომარემ ბიუჯეტის რამდენიმე პარამეტრზე გაამახვილა ყურადღება: „1.1 მლრდ ლარით (ანუ 6.1%-ით) იზრდება გადასახდელების გეგმური მაჩვენებელი და 19.5 მლრდ ლარს აღწევს.

„მინდა საზოგადოებამ ყურადღება მიაქციოს, რომ კანონპროექტის მიხედვით 2021 წლის სახელმწიფო ბიუჯეტის ასიგნებების ზრდის (1.1 ლარის) ძირითადი ნაწილი, დაახლოებით 600 მლნ. ლარი, მოდის COVID-19-ის მართვის, ჯანმრთელობის და სოციალური დაცვის ღონისძიებებზე.

სულ ჯანდაცვისა და სოციალური მიმართულებისთვის ბიუჯეტში გათვალისწინებულია 6 მლრდ. 93 მილიონი ლარი. აი ამხელა რესურსს ხარჯავს მთავრობა მხოლოდ ამ მიმართულებებით“, – განაცხადა ირაკლი კოვზანაძემ საპარლამენტო ტრიბუნიდან და დეპუტატებს მოუწოდა მხარი დაუჭირონ 2021 წლის სახელმწიფო ბიუჯეტში ცვლილებებს.

banner
წინა სტატიაშითურნავა: აშშ-ის სახელმწიფო დეპარტამენტის ანგარიშის თანახმად, საქართველოს ეკონომიკური გუნდის მიერ მიღებული გადაწყვეტილებები ხელს უწყობს საინვესტიციო გარემოს გაჯანსაღებას
შემდეგი სტატიაბურჭულაძე: ნატო-ს სტანდარტების შეიარაღებაზე გადასვლის პროცესი თავდაცვის ძალებში უკვე დაწყებულია