„2022 წლის სახელმწიფო ბიუჯეტის პროექტი პასუხობს იმ გამოწვევებს და საჭიროებებს რაც ჩვენი ეკონომიკის და მოსახლეობის წინაშეა“-ამის შესახებ პარლამენტის საფინანსო-საბიუჯეტო კომიტეტის თავმჯდომარე ირაკლი კოვზანაძემ სესიაზე განაცხადა, სადაც 2022 წლის სახელმწიფო ბიუჯეტის პროექტის საბოლოო ვერსია განიხილეს.
ირაკლი კოვზანაძემ გამოწვევებად და საჭიროებებად რამდენიმე საკითხი დაასახელა: მათ შორის პანდემიასთან ბრძოლის ღონისძიებების ფინანსური უზრუნველყოფა და მაკროეკონომიკური სტაბილურობა.
„პროექტი მოიცავს კოვიდ 19-თან დაკავშირებული ღონისძიებების დაფინანსებას, ასევე მაღალ ხარჯებს მოსახლეობის ჯანდაცვის და სოციალური დაცვის კუთხით. გადადგმულია ნაბიჯები ბიუჯეტის დეფიციტის შემცირების კუთხით, რაც მაკროეკონომიკური სტაბილურობისთვის მნიშვნელოვანია. ვისურვებდი დეფიციტის მაჩვენებელი ჩამოცდეს 4%-ს“-აღნიშნა კომიტეტის თავმჯდომარემ და კიდევ ერთხელ მოუწოდა ფინანსთა სამინისტროს 2022 საბიუჯეტო წლის განმავლობაში წარმოშობილი რეზერვი მიმართონ დეფიციტის შემდგომი შემცირების მიმართულებით, „ეს იქნება თქვენი მნიშვნელოვანი წვლილი მაკროეკონომიკური და მონეტარული სტაბილურობის საქმეში, ფასების ზრდის შეჩერების კუთხით“-აღნიშნა ირაკლი კოვზანაძემ.
დღეს, სესიაზე „საქართველოს 2022 წლის სახელმწიფო ბიუჯეტის შესახებ“ კანონის პროექტი განიხილეს.
