სისტემისთვის და, მათ შორის, მმართველი გუნდისთვის სალომე ზურაბიშვილი რჩება პრეზიდენტად, რომელმაც უხეშად, არაერთგზის დაარღვია კონსტიტუცია და ჩვენთვის არ არის პრეზიდენტი ამ თანამდებობის ღირსი პირი, – ამის შესახებ „ქართული ოცნების“ თავმჯდომარემ, ირაკლი კობახიძემ საქართველოს პირველი არხის ეთერში, გადაცემაში „თავისუფალი ხედვა“ განაცხადა.
ირაკლი კობახიძის შეფასებით, როდესაც საქართველო კანდიდატის სტატუსის მოლოდინშია, სალომე ზურაბიშვილი საბოტაჟს ეწევა, როცა აცხადებს, რომ ხელისუფლება მხოლოდ ფორმალურად ასრულებს ევროკავშირის მოთხოვნებს.
„ვხედავთ, რომ ის ყოველდღიურ რეჟიმში ცდილობს, დააზიანოს ჩვენი ქვეყნის ეროვნული ინტერესები. როდესაც კანდიდატის სტატუსის მოლოდინში ვართ, სალომე ზურაბიშვილი, პრაქტიკულად, რეგულარულად საუბრობს, რომ მხოლოდ ფორმალურად სრულდება ევროკავშირის მოთხოვნები, შესაბამისად, გამოდის, რომ არ ვიმსახურებთ კანდიდატის სტატუსს და ა.შ. ეს პირდაპირ ნიშნავს საბოტაჟს. ანუ, ვართ კონკრეტული სტატუსის მოლოდინში, რის გარშემოც ლამის არიეს ეს ქვეყანა წელიწად-ნახევარია, ამ ფონზე, სალომე ზურაბიშვილი აცხადებს, რომ რეალურად ჩვენ არ უნდა მოგვენიჭოს კანდიდატის სტატუსი. სხვას არაფერს ნიშნავს მისი განცხადება იმასთან დაკავშირებით, რომ ხელისუფლება მხოლოდ ფორმალურად ასრულებს ევროკავშირის მოთხოვნებს. ასეთი რამ „სოროსის ფონდსაც“ კი არ უთქვამს. ორი პუნქტი „სოროსის ფონდმაც“კი ჩაგვითვალა შესრულებულად. ფორმალურად ასრულებსო, სოროსის ფონდიც კი არ ამბობს და ამას ამბობს სალომე ზურაბიშვილი. პირდაპირ გამოვიდა პარლამენტის ტრიბუნიდან და ეს განაცხადა. თუ მხოლოდ ფორმალურად ვასრულებთ, როგორ შეიძლება კანდიდატის სტატუსი მოგვენიჭოს და როცა ამ გზავნილით დადის ევროკავშირის ქვეყნებში, რა თქმა უნდა, ეს პირდაპირ არის იმის საბოტაჟი, რაც დაკავშირებულია ჩვენს ეროვნულ ინტერესებთან. პირველ რიგში, კანდიდატის სტატუსის მიღება მთავარია იმიტომ, რომ დამშვიდდეს ეს ქვეყანა“, – აღნიშნა კობახიძემ.
მისივე თქმით, თუ ვინმეს არ უნდა, რომ საქართველომ მიიღოს კანდიდატის სტატუსი, ეს სწორედ ის ძალებია, რომელთაც სურთ რადიკალიზაციის გაგრძელება.
„კიდევ ერთხელ გავიმეორებ, კანდიდატის სტატუსი, წელიწად-ნახევარია, გამოიყენება რადიკალიზაციისთვის და თუ ვინმეს არ უნდა, რომ საქართველომ მიიღოს კანდიდატის სტატუსი, ეს სწორედ ის ძალებია, რომელთაც სურთ რადიკალიზაციის გაგრძელება. ეს რომ რადიკალურ ოპოზიციას უნდა, გასაგებია, ამისთვის იღვწიან, მაგრამ ამაში თუ ასე ცხადად და ღიად ჩაერთვებოდა სალომე ზურაბიშვილი, ბევრს არ ჰქონდა ამის მოლოდინი. ჩვენ გვქონდა გარკვეული ინფორმაცია ამ ყველაფერზე და, საბოლოო ჯამში, ასეც მოხდა“, – განაცხადა ირაკლი კობახიძემ.
