ირაკლი კობახიძე – მორწმუნე სააკაშვილი სოლიდარობას უცხადებს ურწმუნო ბოკერიას

region
ავტ.: region იანვარი 13, 2020 15:48

ირაკლი კობახიძე – მორწმუნე სააკაშვილი სოლიდარობას უცხადებს ურწმუნო ბოკერიას

მორწმუნე სააკაშვილი სოლიდარობას უცხადებს ურწმუნო ბოკერიას, რაც საინტერესო მოვლენაა, – ამის შესახებ საპარლამენტო უმრავლესობის წევრმა, ირაკლი კობახიძემ საქართველოს ყოფილი პრეზიდენტის, მიხეილ სააკაშვილის განცხადებაზე კომენტარისას აღნიშნა.

სააკაშვილმა „მთავარ აქცენტებში“ ინტერვიუს დროს განაცხადა, რომ „ევროპული საქართველოს“ ერთ-ერთი ლიდერი გიგა ბოკერია, რომელიც სააკაშვილის თქმით, არის ივანიშვილის მსხვერპლი, მათი მხრიდან სოლიდარობას იმსახურებს.

„ამაზე არ შეიძლება სერიოზული კომენტარების გაკეთება. რაც შეეხება 20 ივნისის მოვლენებს, ამასთან დაკავშირებით აუცილებლად მადლობა უნდა გადავუხადოთ მიხეილ სააკაშვილს, რადგან მან საზოგადოებას და სამართალდამცავ ორგანოებს მისცა ჩვეულებრივი აღიარებითი ჩვენება. გაირკვა, რომ როდესაც ნიკანორ მელია აძლევდა ნიშანს საკუთარ აქტივისტებს პარლამენტში შეჭრასთან დაკავშირებით, ეს დავალება სწორედ სააკაშვილისგან მიიღო. აღიარებითი ჩვენება მოვისმინეთ ჩვენ სააკაშვილის მხრიდან, ამისთვის მას დიდი მადლობა“,- განაცხადა ირაკლი კობახიძემ.

ამასთან, 20 ივნისის მოვლენებზე მიხეილ სააკაშვილის განცხადებას შს სამინისტრო შეისწავლის. სააკაშვილმა ინტერვიუს დროს განაცხადა, რომ „2019 წლის 20 ივნისს ბიძინა ივანიშვილი წკიპზე იყო. ცოტაც და ეს რეჟიმი დაემხობოდა. მაშინ, ჩემი აზრით, მომენტი გაშვებული იქნა“.

region
ავტ.: region იანვარი 13, 2020 15:48