ირაკლი კობახიძე ღირსეულად მიუძღვება ღირსეული მამის დაწყებულ საქმეს, – ასე ეხმაურება აჭარის ავტონომიური რესპუბლიკის უმაღლეს საბჭოში ფრაქცია „ქართული ოცნების“ თავმჯდომარე გიორგი მანველიძე უკრაინის რადას ფრაქცია „ხალხის მსახურის“ თავმჯდომარის, დავით არახამიას განცხადებას იმის შესახებ, რომ „ირაკლი კობახიძე КГБ-ს აგენტის შვილია“.
როგორც მანველიძე აცხადებს, სამწუხაროა, რომ ისეთ რეალობაში გვიწევს ცხოვრება, სადაც ზოგიერთი მედიის წარმომადგენლებს ავიწყდებათ პროფესიული ეთიკის ნორმები.
„სრულ მხარდაჭერასა და სოლიდარობას ვუცხადებ ირაკლი კობახიძეს, საქართველოში ეროვნული მოძრაობის ერთ-ერთი ლიდერის შთამომავალს, რომელიც ღირსეულად მიუძღვება ღირსეული მამის დაწყებულ საქმეს – გახადოს საქართველო ძლიერი, თავისუფალი და წარმატებული დიდ ევროპულ ოჯახში! სამწუხაროა, რომ ისეთ რეალობაში გვიწევს ცხოვრება, სადაც ზოგიერთი მედიის წარმომადგენლებს ავიწყდებათ პროფესიული ეთიკის ნორმები“, – აცხადებს მანველიძე, რომლის კომენტარსაც აჭარის ავტონომიური რესპუბლიკის უმაღლესი საბჭოს პრესსამსახური ავრცელებს. ცნობისთვის, უკრაინის რადას ფრაქცია „ხალხის მსახურის“ თავმჯდომარემ განაცხადა: „ირაკლი კობახიძე საერთოდ არ ვიცოდი. ჩემზე რომ დაიწყო ლაპარაკი, მერე დავგუგლე. КГБ-ს აგენტის შვილი. КГБ-ს აგენტის, რომელიც არც მალავს, რომ გადაბირებული იყო და ამ აგენტის შვილი მმართველი პარტიის თავმჯდომარეა. რაზე ვლაპარაკობთ საერთოდ. ეს არის პირდაპირ რუსეთთან თანამშრომლობა”.