გიგი უგულავას მიერ დღეს დასახელებული პირებიდან არც ერთი არ ყოფილა „ქართული ოცნების“ წევრი, – ამის შესახებ „ქართული ოცნება – დემოკრატიული საქართველოს“ აღმასრულებელმა მდივანმა ირაკლი კობახიძემ განაცხადა. მისი თქმით, ამით ცდილობს „ევროპული საქართველო“ გადაფაროს ის პროცესები, რომელიც მიმდინარეობს მათ პარტიაში.
„ჩვენ ვხედავთ, რომ კონკრეტული პირები გადადიან მათი პარტიიდან სხვა პარტიებში. რაც შეეხება ამ კონკრეტულ ფაქტს, აქ მაქვს კონკრეტული მონაცემი, თუ როდის რომელ პარტიაში იყვნენ კონკრეტული პირები გაწევრიანებულები. ზოგიერთი მათგანი იყო „რესპუბლიკელი“, ზოგი „თავისუფალი დემოკრატების“ წევრი და ა.შ. სახელებით და გვარებით შემიძლია გადმოგცეთ მათი სია. არც ერთი მათგანი არ ყოფილა „ქართული ოცნების“ წევრი. ეს არის მარტივი მანიპულაცია, რომელთან დაკავშირებითაც გვაქვს კონკრეტული პასუხები“, – განაცხადა კობახიძემ.
პარტია „ევროპული საქართველოს“ ინფორმაციით, „ქართული ოცნების“ დამფუძნებლებმა, კოორდინატორებმა, ზონის უფროსებმა და აქტივისტებმა პარტია სამეგრელოს რეგიონშიც დატოვეს და „ევროპულ საქართველოს“ შეუერთდნენ.
როგორც „ინტერპრესნიუსს“ „ევროპული საქართველოდან“ აცნობეს, გურიისა და ქვემო ქართლის მსგავსად, „ოცნების“ უკვე ყოფილი წარმომადგენლები ამ შემთხვევაშიც აცხადებენ, რომ საპრეზიდენტო კანდიდატად სალომე ზურაბიშვილის წამოყენება მათთვის წითელი ხაზია და არჩევნებზე ზურაბიშვილის სასარგებლოდ მუშაობას არ აპირებენ.
„ევროპული საქართველოს“ ერთ-ერთი ლიდერის, გიგი უგულავას განცხადებით, სალომე ზურაბიშვილი არის ის „ნელი მოქმედი ნაღმი“, რომელსაც „ქართული ოცნება“ ქართულ სახელმწიფოებრიობას ფუნდამენტში უდებს.
