ირაკლი კობახიძე: არჩევნები ჩატარდება გამართულად, არავის მისი რაიმე არსებითი ფორმით გაკრიტიკების საფუძველი არ ექნება

ჩვენ კარგად მომზადებული ვხვდებით საპარლამენტო არჩევნებს, პირობას ვაძლევთ საზოგადოებას, რომ არჩევნები ჩატარდება გამართულად, ისე, რომ არავის მისი რაიმე არსებითი ფორმით გაკრიტიკების საფუძველი არ ექნება, ჩვენ პასუხისმგებელი ვართ სამართლიანი, კონკურენტული არჩევნების ჩატარებაზე, – ამის შესახებ „ქართული ოცნების“ თავმჯდომარემ, ირაკლი კობახიძემ საქართველოს პირველი არხის გადაცემაში „თავისუფალი ხედვა“ განაცხადა.

როგორც ირაკლი კობახიძემ აღნიშნა, კანონმდებლობა შეიცვალა ფუნდამენტურად, რაც პირდაპირ აისახება საარჩევნო პროცედურებზე.

„არჩევნების დღისთვის ფუნდამენტურად იცვლება პროცედურები, შემოდის ელექტრონული კენჭისყრის წესი. ამომრჩეველთა რეგისტრაცია განხორციელდება ელექტრონული წესით და ასევე კენჭისყრა, ხმის დათვლა განხორციელდება ელექტრონული წესით, რაც ძალიან მნიშვნელოვანი სიახლეა. გახსოვთ, იყო სერიოზული სირთულეები არჩევნების დღეს, მათ შორის იყო ადამიანური შეცდომები, დაუბალანსებელი ოქმები, ეს არის 30-წლიანი პრობლემა ჩვენი ქვეყნის საარჩევნო ისტორიაში. ეს ყველაფერი ერთი ხელის მოსმით გვარდება იმის ხარჯზე, რომ შეიცვალა კანონმდებლობა, შემოდის ელექტრონული რეგისტრაცია და კენჭისყრა. ანუ, არჩევნების დღისთვის რაც იყო პრობლემური, თუ სასპეკულაციო საკითხი, ყველაფერი პრაქტიკულად ერთი ხელის მოსმით მოგვარდა იმ საკანონმდებლო ცვლილებებით, რომლებიც განხორციელდა“, – განაცხადა ირაკლი კობახიძემ.

მისი თქმით, აქედან გამომდინარე, ოპონენტებს ძალიან უჭირთ აქცენტის გაკეთება არჩევნების დღეზე და ახლა ცდილობენ, აქცენტები გადაიტანონ წინასაარჩევნო პერიოდზე.

„წინასაარჩევნო პერიოდს რაც შეეხება, ინტენსიური წინასაარჩევნო ფაზა იქნება ორთვიანი, სექტემბერ-ოქტომბერი არსებითად, ივლისიდან ალბათ მეტ-ნაკლებად გახურდება საარჩევნო კამპანია. ყველას შეუძლია, დააკვირდეს არჩევნებს, თუ პრეტენზიები იქნება, ყველას შეეძლება ამ პრეტენზიების წარმოდგენა, მაგრამ ჩვენ პირობას ვაძლევთ საზოგადოებას, რომ არჩევნები ჩატარდება გამართულად, ისე, რომ საფუძველი არ ექნება არავის მისი რაიმე არსებითი ფორმით გაკრიტიკების. თუ იქნება კრიტიკა, მზად ვართ ყველა შემთხვევაში პასუხისთვის, მაგრამ ჩვენ პასუხისმგებელი ვართ სამართლიანი, კონკურენტული არჩევნების ჩატარებაზე ამ ქვეყანაში“, – განაცხადა ირაკლი კობახიძემ.

banner
წინა სტატიაშივოლოდიმირ ზელენსკი – მე მაქვს სამუშაო ურთიერთობა ზალუჟნისთან და ვაპირებ, მასთან მუშაობა გავაგრძელო
შემდეგი სტატიავოლოდიმირ ზელენსკი – უკრაინა ნატო-ში მიწვეული არ არის, ალიანსში ნაწილობრივ გაწევრიანებასთან დაკავშირებით სიგნალები კი სისულელეა