ირაკლი კობახიძე – 12 პუნქტზე ციფრებით მანიპულირება არ არის სწორი, ვინმე თუ გულშემატკივრობს საქართველოს მიერ კანდიდატის სტატუსის მიღებას, რა თქმა უნდა, მან არ უნდა იმანიპულიროს ციფრებით

12 პუნქტზე ციფრებით მანიპულირება არ არის სწორი, ვინმე თუ გულშემატკივრობს საქართველოს მიერ კანდიდატის სტატუსის მიღებას, რა თქმა უნდა, მან არ უნდა იმანიპულიროს ციფრებით, – ამის შესახებ პარტია „ქართული ოცნების“ თავმჯდომარე ირაკლი კობახიძემ ჟურნალისტებს ზუგდიდში განუცხადა.

კობახიძის თქმით, საქართველო თავიდან ბოლომდე მზად არის, დეკემბერში კანდიდატის სტატუსი მიიღოს.

პარტია „ქართული ოცნების“ თავმჯდომარეს ჟურნალისტებმა ჰკითხეს ევროკავშირის უმაღლესი წარმომადგენლის, ევროკომისიის ვიცე-პრეზიდენტის, ჯოზეფ ბორელის განცხადებაზე, რომ „12 პრიორიტეტის სახით მკაფიოდ გაწერილია ამოცანები, ივნისის შემდეგ საქართველომ შეასრულა სამი მათგანი, დანარჩენი ცხრა პროცესშია, თუმცა დრო არის მათ შესასრულებლად“.

„ევროკავშირის პოზიციას რაც შეეხება, რომელსაც ჩვენ არ ვეთანხმებით, ამბობენ, რომ სამი სრულად არის შესრულებული და დანარჩენ შემთხვევაში, ზოგი დიდწილად შესრულებულია, ზოგი სანახევროდ, ზოგი ასე, ზოგი – ისე, მაგრამ არსებითად, ჩვენ რაც შეგვეძლო, გაგვეკეთებინა ივნისის ბოლომდე ყველაფერი გავაკეთეთ და დამატებით რაც გვითხრეს, იმასაც ვაკეთებთ. აქედან გამომდინარე, საქართველო თავიდან ბოლომდე მზად არის, დეკემბერში მიიღოს კანდიდატის სტატუსი.

მინდა, ასევე შეგახსენოთ, მოლდოვისა და უკრაინის მონაცემები. მათ უკვე აქვთ კანდიდატის სტატუსი, თუმცა შეასრულეს ცხრიდან სამი მოთხოვნა, შვიდიდან ორი მოთხოვნა. დეკემბერში საქართველო არა მარტო იმსახურებს კანდიდატის სტატუსს, არამედ დეკემბერში, ისევე როგორც დღეს, იქნება ყველაზე წინ ამ სამეულში, თავისი განვითარებით, მათ შორის პუნქტების შესრულებით“, – განაცხადა ირაკლი კობახიძემ.

საქართველო იქნება თავიდან ბოლომდე მზად, რათა დეკემბერში მიიღოს კანდიდატის სტატუსი, – ამის შესახებ პარტია „ქართული ოცნების“ თავმჯდომარემ, ირაკლი კობახიძემ ჟურნალისტებს ზუგდიდში განუცხადა.

მისივე თქმით, იმედოვნებს, რომ შარშანდელისგან განსხვავებით, წელს მაინც იქნება მიღებული სამართლიანი გადაწყვეტილება.

„ამისთვის ყველაფერი კეთდება და ყველაფერი გაკეთდება. დანარჩენი, ვნახოთ. იმედია, რომ ამ წელს მაინც, შარშანდელისგან განსხვავებით, მიღებული იქნება სამართლიანი გადაწყვეტილება. თქვენ გახსოვთ, რომ შარშან მოლდოვასა და უკრაინას ავანსად მიეცათ კანდიდატის სტატუსი, საქართველოს კი, უარი ეთქვა. ამას დღემდე იყენებს რადიკალური ოპოზიცია პოლარიზაციისთვის. რა თქმა უნდა, ეს არ არის სწორი და სამართლიანი. იმედი გვაქვს, წელს იქნება მიღებული სამართლიანი გადაწყვეტილება, რაც მნიშვნელოვნად დადებითად აისახება, მათ შორის ე.წ. პოლარიზაციაზეც საქართველოში“, – განაცხადა კობახიძემ.

banner
წინა სტატიაშიირაკლი კობახიძე – „ნაცმოძრაობას“ დღეს ორი მასხარა უდგას სათავეში, ხაბეიშვილი და ვაშაძე, ორი ცნობილი ლუზერი
შემდეგი სტატიაკახა კალაძე – ჩვენი მიზანია, რაც შეიძლება მალე გავხდეთ ევროპული დიდი ოჯახის წევრი, მაგრამ ეს არ ნიშნავს იმას, რომ უარი ვთქვათ ჩვენი ქვეყნის ინტერესების დაცვაზე