ირაკლი ღარიბაშვილი – შეურაცხმყოფელია რეზოლუცია, რომელიც გაჯერებულია ტყუილებით, არაზუსტი ინფორმაციით

შეურაცხმყოფელია რეზოლუცია, რომელიც გაჯერებულია ტყუილებით, არაზუსტი ინფორმაციით, – ამის შესახებ საქართველოს პრემიერ-მინისტრმა, ირაკლი ღარიბაშვილმა ჟურნალისტებს ევროპარლამენტის რეზოლუციასთან დაკავშირებით განუცხადა.

მისი თქმით, ევროპარლამენტის რეზოლუციას იმ პროცესში, რომელშიც საქართველო იმყოფება, არავითარი გადამწყვეტი მნიშვნელობა არ აქვს.

„მინდა, ჩვენს მოქალაქეებს სრული პასუხისმგებლობით ავუხსნა, რომ ევროპარლამენტის ასეთ რეზოლუციას ამ პროცესში, სადაც ჩვენ ვიმყოფებით, არავითარი გადამწყვეტი მნიშვნელობა, ანუ გადაწყვეტილების ფორმირების პროცესში, არ აქვს. მათი როლი არის, შეიძლება ითქვას, სიმბოლური და გასაგებია. ასევე მინდა ვთქვა, რომ, რა თქმა უნდა, შეურაცხმყოფელია ის რეზოლუცია, რომელიც არის გაჯერებული ტყუილებით, არაზუსტი ინფორმაციით და ამაში მე დავინახე ირაციონალურობაც, ყოველგვარი გონივრულობა და რაციონალურობა ამ რეზოლუციაში არის ამოვარდნილი, ძალიან ბევრი ფაქტობრივი უზუსტობა, ძალიან ბევრი ტყუილი, რაც ჩემთვის არის ძალიან სამწუხარო. საერთოდ, ჩვენ ძალიან კარგად ვიცით და გვესმის, ახლა ისე ნუ წარმოვაჩენთ ამ სპექტაკლს, რომელიც აქ დაიდგა და ძალიან აჟიტირებული არიან ქვეყნის მტრები, შიდა მტრებიც და გარე მტრებიც, რომ თითქოს რაღაც სასწაული ხდება და სასწაულს კარგავს ქვეყანა. მეგობრებო, ყველას შეგახსენებთ, რომ ჩვენ, ჩვენი ხელისუფლება, ბიძინა ივანიშვილის ხელისუფლება 2012 წელს რომ მოვიდა ქვეყნის სათავეში, მაშინ ჩავიბარეთ უმძიმესი მემკვიდრეობა. ეს იყო რეალურად დიქტატორული რეჟიმი, სადაც ადამიანებს კლავდნენ, ხოცავდნენ, აუპატიურებდნენ და საშინელება ხდებოდა. არც თავისუფალი მედია არსებობდა, არც თავისუფალი სასამართლო, არავითარი დემოკრატიის ნიშანწყალი არ არსებობდა ქვეყანაში 2012 წელს. რაც შეეხება აწმყოს, ჩვენ ბოლო ცხრა წლის განმავლობაში, იგივე ბიძინა ივანიშვილის მიერ დატოვებულმა გუნდმა და მისმა ხელისუფლებამ, მისმა პარტიამ ყველა მნიშვნელოვანი სტრატეგიული დოკუმენტი, ნაბიჯი რამაც რეალურად ხელშესახებად დაგვაახლოვა ევროპასთან, ჩვენ გავაფორმეთ. და შეგახსენებთ ყველას, მათ შორის ჩვენს კრიტიკოსებს და არაობიექტურ ადამიანებს, ასოცირების შეთანხმება ვინ გააფორმა, ეს გააფორმა „ქართულმა ოცნებამ“, ანუ ბიძინა ივანიშვილის ხელისუფლებამ, მისმა დატოვებულმა გუნდმა, ასევე უვიზო რეჟიმი, რომლითაც თქვენ ყველანი, ჩვენი მოქალაქეები სარგებლობთ, თავისუფალი ვაჭრობა. ახლა უკვე ოფიციალურად ჩვენ წარვადგინეთ წევრობაზე განაცხადი, ანუ ყველა ის ეფექტური ნაბიჯი, რაც მთავრობას უნდა გადაედგა, ჩვენი მხრიდან არის შესრულებული“, – განაცხადა ირაკლი ღარიბაშვილმა.

წინა სტატიაში„საინტერესოა, როგორ აპირებს სერიოზული ნაბიჯების გადადგმას ქვეყნის გადასარჩენად შეწყალების ინსტრუმენტის გამოყენების გარეშე“ – გიგი წერეთელი
შემდეგი სტატიაირაკლი ღარიბაშვილი – ბიძინა ივანიშვილის მიერ დატოვებულმა გუნდმა და მისმა პარტიამ გავაფორმეთ ყველა მნიშვნელოვანი სტრატეგიული დოკუმენტი, რამაც რეალურად, ხელშესახებად დაგვაახლოვა ევროპასთან