გადაუდებელ ამოცანას წარმოადგენს, ჩვენი უსაფრთხოების სამსახურებმა და პოლიციამ ადმინისტრაციულ საზღვრისპირა რეგიონებში 24-საათიანი პატრულირება დაიწყონ, – ამის შესახებ „თავისუფალი დემოკრატების“ ლიდერმა ირაკლი ალასანიამ განაცხადა, რომელიც დღეს ზუგდიდში, გიგა ოთხოზორიას დაკრძალვაზე იმყოფებოდა.
ალასანიას თქმით, გიგა ოთხოზორია, რომელიც რუსეთის ოკუპაციის მორიგი მსხვერპლი გახდა, უნდა გახდეს მაგალითი იმის, რომ დაიწყოს საზღვრისპირა რეგიონში უსაფრთხოების სამსახურების დამოკიდებულების ცვლილება.
„მე მგონია, რომ მიუხედავად ემოციური აღშფოთებისა და იმ უდიდესი ტრაგედიისა, რომელიც განვიცადეთ ამ საზარელი მკვლელობით, ეს მხოლოდ ემოციად არ უნდა დარჩეს და რეალურად გადავიდეს ქმედებებში. ეს იქნება ერთადერთი – რომ ადმინისტრაციულ საზღვრისპირა რეგიონებში ქმედებების ახლებურად გააზრება დავიწყოთ. კერძოდ, ჩვენი ქვეყნის პოლიციას, უსაფრთხოების სამსახურებს უნდა ჰქონდეთ ცხადი უფლებამოსილებები და პასუხისმგებლობა, დაიცვან ყველა მოქალაქე ნებისმიერი საფრთხისგან. ასეთი რამ არ უნდა განმეორდეს. გადაუდებელ ამოცანას წარმოადგენს ის, რომ ჩვენმა უსაფრთხოების სამსახურებმა, პოლიციამ დაიწყოს 24-საათიანი პატრულირება ისეთ ადგილებში, სადაც ჩვენი მოსახლეობის უსაფრთხოება დასაცავია. უნდა იყოს როგორც ჩვენი სპეცდანიშნულების ძალების წარმომადგენელი, ასევე უნდა არსებობდეს სხვადასხვა ოპერატიული შესაძლებლობები, რომ ვაკონტროლოთ ადმინისტრაციული საზღვარი. რაც ყველაზე უფრო მნიშვნელოვანია არის ის, რომ ცხადი, ნათელი გაწერილი ინსტრუქცია ჰქონდეს ჩვენს პოლიციას და უსაფრთხოების სამსახურებს, თუ როგორ მოიქცნენ, როცა საფრთხე ემუქრება ჩვენს მოქალაქეს. ჩემი აზრით, იქ რომ ყოფილიყვნენ მომზადებული სამართალდამცავი სტრუქტურის წარმომადგენლები ან დააკავებდნენ დამნაშავეს ან გახსნიდნენ საპასუხო ცეცხლს და ეს იქნებოდა საფუძველი, რომ მომავალში ვერავინ გაბედოს ჩვენ მიერ კონტროლირებად ტერიტორიაზე გადმოსვლა და ასეთი ცინიკური დანაშაულის ჩადენა“, – განაცხადა ალასანიამ.
მისივე თქმით, ასევე, ეროვნულ ამოცანად უნდა გავხადოთ ამ დანაშაულის ორგანიზებაში და შესრულებაში ჩართული ყველა ადამიანის მხილება და მათი პასუხისგებაში მიცემა. „მე პირადად ჩემ ამოცანად გავიხდი სწორედ ამ ადამიანის დასჯას კანონის მთელი სიმკაცრით“, – დასძინა ირაკლი ალასანიამ.
წყარო: www.ipn.ge
